બિગ બોસ-2ના વિજેતા આશુતોષે કરી રેસ્ટોરન્ટમાં મારામારી

Published: Thursday, March 14, 2013, 16:58 [IST]

મુંબઇ, 14 માર્ચ: 'બિગ બોસ' સિઝન-2ના વિજેતા આશુતોષ કૌશિક પર એક પાર્ટી દરમિયાન નશાની હાલતમાં મારામારી કરવાનો આરોપ લાગ્યો છે. મુંબઇના લોખંડવાલા વિસ્તારમાં મોડીરાત્રે એક રેસ્ટોરન્ટમાં આયોજીત પાર્ટીમાં જોરદાર હોબાળો મચી ગયો. આશુતોષનું કહેવું છે કે રેસ્ટોરન્ટમાં તેની સાથે મારામારી કરવામાં આવી છે.

સૂત્રો દ્વારા મળતી માહિતી અનુસાર આ મારામારીની શરૂઆત ફોટો પડાવવાથી શરૂ થઇ હતી. જેમાં બન્યુ એવું કે કોઇએ આશુતોષના ફોટોગ્રાફર મિત્રને તમાચો ચોડી દીધો, ત્યારબાદ ઘણા લોકો મારામારી પર ઉતારુ થઇ ગયા. આ દરમિયાન આશુતોષને પણ માર મારવામાં આવ્યો. આશુતોષે આરોપ લગાવ્યો કે ઘટનાસ્થળે હાજર હોવા છતાં પોલીસ તેને માર ખાતા જોતી રહી.

ત્યાર બાદ રેસ્ટરન્ટમાંથી બાર આવીને પણ આશુતોષે રસ્તા પર જોરદાર નાટક કર્યું. તેણે જણાવ્યું કે મને પાર્ટીમાં તમાચો મારવામાં આવ્યો, પરંતુ મહારાષ્ટ્ર પોલીસે મારી કોઇ મદદ કરી નહી. તેણે જણાવ્યું કે મહારાષ્ટ્ર પોલીસ તો ત્યારે આવે છે જ્યારે તમાચો પડી જાય છે.

Published On March 14, 2013