અમદાવાદ મ્યુનિસિપલ કોર્પોરેશનનું 17018 કરોડનું બજેટ રજૂ, જાણો શું છે ખાસ?
અમદાવાદ મ્યુનિસિપલ કમિશનર બંછાનિધિ પાનીએ વર્ષ ૨૦૨૬-૨૭ માટે ૧૭,૦૧૮ કરોડનું ડ્રાફ્ટ બજેટ રજૂ કર્યું છે. ગયા વર્ષના ૧૪,૦૦૧ કરોડની સરખામણીએ આ વખતે બજેટના કદમાં ધરખમ વધારો જોવા મળ્યો છે. આ બજેટનું કદ ભારતના કેટલાક નાના રાજ્યોના કુલ બજેટ કરતા પણ વધારે હોવાનું મનાય છે.
શહેરીજનો માટે રાહતના સમાચાર એ છે કે આ બજેટમાં કોઈ પણ નવા કરવેરા લાદવામાં આવ્યા નથી. જોકે, નિયમ મુજબ વાર્ષિક બે ટકાનો સામાન્ય ટેક્સ વધારો આપોઆપ લાગુ થશે તેમ જણાવવામાં આવ્યું છે. ચૂંટણીના વર્ષને ધ્યાનમાં રાખીને તંત્ર દ્વારા લોકપ્રિય જાહેરાતો પર વિશેષ ભાર મૂકવામાં આવ્યો છે.
ટ્રાફિક સમસ્યાના ઉકેલ માટે નહેરુનગરથી શિવરંજની અને ઇસ્કોન સુધી એલિવેટેડ કોરિડોર બનાવવાનું આયોજન છે. શહેરમાં પાંચ નવા રેલવે ઓવરબ્રિજ અને ત્રણ ફ્લાયઓવર બ્રિજનું નિર્માણ કરીને કનેક્ટિવિટી સુધારવામાં આવશે. આ ઉપરાંત, છ નવા સ્પોર્ટ્સ કોમ્પ્લેક્સ બનાવીને રમતગમતના માળખાને વધુ મજબૂત બનાવવાની જાહેરાત કરાઈ છે.
ભવિષ્યમાં ઓલિમ્પિક અને કોમનવેલ્થ ગેમ્સના આયોજનને ધ્યાનમાં રાખીને સ્પોર્ટ્સ ઇન્ફ્રાસ્ટ્રક્ચર પર ધ્યાન અપાયું છે. શહેરની સેવાઓને વધુ ઝડપી અને સ્માર્ટ બનાવવા માટે AI (આર્ટિફિશિયલ ઇન્ટેલિજન્સ) ટેકનોલોજીનો ઉપયોગ વધારાશે. પર્યાવરણની જાળવણી માટે ગ્રીન કવર વધારવા અને જળસંચયના પ્રોજેક્ટ્સને પણ પ્રાધાન્ય આપવામાં આવ્યું છે.
નોંધનીય છે કે ગત વર્ષના સિટી સ્ક્વેર અને આઈકોનિક રોડ જેવા અનેક મહત્વકાંક્ષી પ્રોજેક્ટ્સ હજુ પેન્ડિંગ છે. હવે આ ડ્રાફ્ટ બજેટ સ્ટેન્ડિંગ કમિટી અને ત્યારબાદ જનરલ બોર્ડમાં મંજૂરી માટે રજૂ કરવામાં આવશે. ૨૦ ફેબ્રુઆરી સુધીમાં આ બજેટને અંતિમ મંજૂરી મળે તેવી પૂરેપૂરી શક્યતાઓ સેવાઈ રહી છે.
Click it and Unblock the Notifications
Sign in with Google
