અમદાવાદની હોસ્પિટલના પલંગ નીચે માતાની અને કબાટમાંથી મળી દીકરીની લાશ
અમદાવાદના કાગડાપીઠ પોલીસ સ્ટેશનની હદમાં આવેલા ભુલાભાઈ પાર્ક પાસે આવેલી હોસ્પિટલ અંદરથી તીવ્ર દુર્ગંધ આવી રહી હતી. જે બાદ હોસ્પિટલ સ્ટાફ દ્વારા હોસ્પિટલના ઓપરેશન થિયેટરની અંદરના એક કબાટને ખોલવામાં આવ્યો હતો.
અમદાવાદ : રાજ્યના મહાનગર અમદાવાદમાંથી એક હૃદયદ્રાવક ઘટના સામે આવી છે. અમદાવાદની એક હોસ્પિટલમાં માતા અને પુત્રીના મૃતદેહ મળી આવ્યા છે. આ ઘટના અંગે મળતી માહિતી મુજબ, ઓપરેશન થિયેટરના કપડામાંથી પુત્રીની લાશ મળી હતી. જે બાદ આસપાસ તપાસ કરતા પલંગની નીચેથી માતાની લાશ મળી આવી હતી.
હોસ્પિટલ અંદરથી આવી રહી હતી તીવ્ર દુર્ગંધ
મળતી માહિતી મુજબ અમદાવાદના કાગડાપીઠ પોલીસ સ્ટેશનની હદમાં આવેલા ભુલાભાઈ પાર્ક પાસે આવેલી હોસ્પિટલ અંદરથી તીવ્ર દુર્ગંધ આવી રહી હતી. જે બાદ હોસ્પિટલ સ્ટાફ દ્વારા હોસ્પિટલના ઓપરેશન થિયેટરની અંદરના એક કબાટને ખોલવામાં આવ્યો હતો. આ કબાટ ખોલતા જ બધાના હોશ ઉડી ગયા હતા. કારણ કે, અંદરનું દ્રશ્ય અતિ ભયાનક હતું. 30 વર્ષની મહિલાની લાશ આ કબાટમાં રાખવામાં આવી હતી.
પલંગ નીચેથી મળી માતાની લાશ
જે બાદ આજુબાજુમાં વધુ તપાસ કરવામાં આવતા, પલંગની નીચે અન્ય એક મહિલાનો મૃતદેહ મળી આવ્યો હતો. આ મહિલાની ઓળખ કબાટમાંથી મળી આવેલી મહિલાની માતા તરીકે થઇ હતી. આ ઘટનાની જાણ થતાં હોસ્પિટલ સ્ટાફ દ્વારા અમદાવાદ પોલીસને જાણ કરવામાં આવી હતી. આ ઘટનાની જાણ થતાં સ્થાનિક પોલીસ સ્ટેશનનો સ્ટાફ હોસ્પિટલ પહોંચી ગયો હતો. જે બાદ પોલીસે તપાસ શરૂ કરી છે. પોલીસે હત્યાનો ગુનો નોંધી આગળની કાર્યવાહી હાથ ધરી છે.