બાપુનગર વાયરલ વીડિયો બાદ પોલીસ હરકતમાં, આરોપીની ધરપકડ, બે પોલીસકર્મી સસ્પેન્ડ

Published: Friday, December 20, 2024, 9:37 [IST]

Bapunagar viral video: ગુજરાત પોલીસને શર્મસાર કરે તેવો એક વીડિયો હાલ સોશિયલ મીડિયામાં વાયરલ થઈ રહ્યો છે. આ વાયરલ વીડિયો રખિયાલ અને બાપુનગરના અસામાજિક તત્વો અને લાચાર પોલીસનો છે.

જેમાં જોઈ શકાય છે કે, એક વ્યક્તિ પોલીસને ધક્કા મારીને પીસીઆર વાનમાં બેસાડતો અને કડક શબ્દોમાં નીકળી જવા જણાવી રહ્યો છે. જે સામે પોલીસ પણ લાચાર અને અસહાય બનીને ઘટનાસ્થળેથી ચાલી જાય છે.

ઘટનાની વિગતો અનુસાર, અમદાવાદના રખિયાલ અને બાપુનગર વિસ્તારમાં જાહેર માર્ગો પર અસામાજિક તત્વો ખુલ્લેઆમ તલવારો અને હથિયારો લહેરાતા દર્શાવતા બુધવારે રાત્રે સોશિયલ મીડિયા પર વીડિયો વાયરલ થયો હતો, જેના કારણે પોલીસ પ્રત્યે જનતામાં રોષ ફાટી નિકળ્યો હતો.

એક વીડિયોમાં અપરાધીઓ ઘટનાસ્થળે પોલીસ અધિકારીઓને તેમના પોતાના વાહનમાં જબરદસ્તીથી બેસાડી રવાના કરતા જોવા મળ્યા હતા.

આ ઘટના બાદ બે ફરિયાદ દાખલ કરવામાં આવી છે, અને અત્યાર સુધીમાં સમીર ઉર્ફે ચિકના મહેબૂબ મિયા નામના એક વ્યક્તિની ધરપકડ કરવામાં આવી છે. આ સાથે પીસીઆરના બે પોલીસકર્મીને પણ સસ્પેન્ડ કરવામાં આવ્યા છે.

'પોપાભાઈનું રાજ'

ગુજરાતમાં ગુંડાઓને પોલીસનો કોઈપણ જાતનો ડર નથી રહ્યો, અસામાજિક તત્વો બેફામ છે..

અમદાવાદમાં પોલીસે જ ભાગવું પડે એટલી હદે ગુંડાઓનો આતંક ફેલાઈ ગયો છે@sanghaviharsh, @Bhupendrapbjp તમારા રાજમાં પોલીસની આવી હાલત હોય તો સામાન્ય જનતાની શું હાલત હશે?

શરમ કરો શરમ..… pic.twitter.com/rrR5BrDaY1
— Amit Chavda (@AmitChavdaINC) December 19, 2024

સદ્દામુદ્દીન શેખ દ્વારા રખિયાલ પોલીસ સ્ટેશનમાં દાખલ કરવામાં આવેલી એફઆઈઆર મુજબ, હથિયારોથી સજ્જ છ આરોપીઓ એક જૂથ તરીકે તેમની પાસે આવ્યા હતા.

આ છ આરોપીઓએ ઝઘડો કર્યો, અપશબ્દોનો ઉપયોગ કર્યો, તેના પર ઘાતક હથિયારો વડે હુમલો કર્યો, તેને મારી નાખવાનો પ્રયાસ કર્યો અને ઘટનાસ્થળેથી ભાગી જતા પહેલા તેના ભાઈને મારી નાખવાની ધમકી આપી હતી.

આ અફરાતરરીનો માહોલ રખિયાલની નૂર મહેલ હોટેલ પાસે સર્જાઈ હતી, જ્યાં અસામાજિક તત્વો તલવારો અને અન્ય શસ્ત્રો લહેરાતા જોવા મળ્યા હતા અને બાદમાં બાપુનગર વિસ્તારમાં ફેલાઈ ગયા હતા.

એક તબક્કે આરોપીઓએ પોલીસ અધિકારીઓને હથિયારોથી ધમકાવીને તેમને બળજબરીથી પોલીસ વાહનમાં બેસાડી કારમાં તોડફોડ કરી હતી. જે બાદ મોડી રાત્રે પોલીસના ઉચ્ચ અધિકારીઓ ઘટનાસ્થળે દોડી આવ્યા હતા, અને સ્થિતિને કાબુમાં લીધી હતી.

રખિયાલ પોલીસ દ્વારા આ મામલે ફરિયાદ નોંધવામાં આવી છે. જે બાદ સમીર ઉર્ફે ચિકના મહેબૂબ મિયા તરીકે ઓળખાતા આરોપીની ધરપકડ કરી હતી.

આ ઘટના અંગે બાપુનગર પોલીસે પણ અલગ કેસ દાખલ કર્યો હતો. આ મામલે પોલીસે સરવર ઉર્ફે કડવા, ફઝલ, અન્ની રાજપૂત, અલ્તાફ ઉર્ફે જુમ્મન અને મહેફુઝ નામના બાકીના પાંચ શકમંદોને પકડવા માટેની કવાયત હાથ ધરી છે.

ઉલ્લેખનીય છે કે, આ આરોપીઓ વિરૂદ્ધ કલમ 109, 189(2), 189(4), 190, 191(1), 191(2), 191(3), 115(2), 296(b), 54 અને 351(2) ભારતીય ન્યાય સંહિતા, તેમજ ગુજરાત પોલીસ અધિનિયમની કલમ 135(1) હેઠળ ગુનો નોંધવામાં આવ્યો છે.

તા.૧૮/૧૨/૨૪ ના રાત્રીના સમયે બાપુનગર રખિયાલ વિસ્તારના વાયરલ થયેલા વીડિયો બાબતે પોલીસ દ્વારા તપાસ કરીને આરોપીની ઓળખ કરીને પકડી પાડવામાં આવ્યા છે તેમજ આગળની કાર્યવાહી કરવામાં આવી રહી છે.
— Ahmedabad Police અમદાવાદ પોલીસ (@AhmedabadPolice) December 19, 2024