જામનગર જિલ્લાના પસાયા ગામે કોઝ વે, ચેકડેમ તેમજ ભોજનાલયનું ખાત મુહર્ત કરતા કૃષિ મંત્રી રાઘવજીભાઈ પટેલ

કૃષિ મંત્રી રાઘવજીભાઈ પટેલે જામનગર જિલ્લાના પસાયા ગામે કોઝ વે, ચેકડેમ તેમજ મહાકાળી માતાજીના મંદિરમાં નવા ભોજનાલયનું ખાતમુહર્ત કર્યું હતું. પસાયા (બેરાજા) ગામે રૂ. 37.98 લાખના ખર્ચે નાના- મોટા કુલ 5 ચેકડેમનું કૃષિમંત્રીએ ખાતમુહૂર્ત કર્યું હતું. વિસ્તારની રૂપારેલ નદી પર નવા કોઝ વે કુલ રૂ. 29.54 ના ખર્ચે બનાવવામાં આવશે.

વિવિધ ખાતે મુહર્ત પ્રસંગે કૃષિમંત્રીએ જણાવ્યું હતું કે અત્યારે ચોમાસાની શરૂઆતમાં જ તમામ ચેકડેમ, કોઝ વેના રિપરિંગ કાર્યો તાત્કાલિક ધોરણે પૂરા કરવાનો લક્ષ્યાંક રહેલો છે. તેમણે ઉપસ્થિત અધિકારીશ્રીઓને ખેડૂતોના પ્રશ્નોનો ઝડપથી ઉકેલ લઇ આવવા માટે તાકીદ પણ કરી હતી. પશુપાલકોને તેમના પશુઓના નિભાવ માટે સરકાર તરફથી રૂ. 1.60 લાખની લોન 1 વર્ષ માટે વગર વ્યાજે ઉપલબ્ધ છે, જેનો મહત્તમ ફાયદો લેવા ગ્રામજનોને અપીલ કરી હતી. બિનવારસી ઢોર માટે પણ અત્યારે સંકલન ચાલી રહ્યું છે. સરકાર દ્વારા પ્રાકૃતિક ખેતીનો મહત્તમ પ્રચાર પ્રસાર થઇ રહ્યો છે, તેના તરફ પણ ખેડૂતોએ આગળ વધવું જોઈએ. પ્રાકૃતિક ખેતી એ ગાય આધારિત ખેતી છે. સરકાર દ્વારા 2 લાખથી વધુ ખેડૂતોને ગાયના નિભાવખર્ચ તરીકે રૂ. 10800ની સહાય પણ આપવામાં આવી છે. કૃષિમંત્રીએ પસાયા ગામના મહાકાળી માતાજીના મંદિરના નિર્માણાધીન ભોજનાલય માટે રૂ. 51000નું અનુદાન પણ આપ્યું હતું.

આ પ્રસંગે જિલ્લા પંચાયતના કારોબારી સમિતિના અધ્યક્ષ ભરતભાઈ બોરસદિયાએ જણાવ્યું હતું કે સરકાર દ્વારા અત્યાર સુધીમાં રૂ. 100 કરોડના વિવિધ રસ્તાના કામને મંજૂરી મળી છે. તેમજ અંદાજિત રૂ. 35 કરોડના જોબ નંબર પણ મળ્યા છે. આપણા વડાપ્રધાન શ્રી નરેન્દ્રભાઈ મોદી ખેડૂતોના વિવિધ પ્રશ્નોના ઉકેલ માટે સતત પ્રયત્નશીલ રહયા છે.

English summary

Agriculture Minister inaugurates Rs 2.5 lakh causeway work on Ruparel river