ACB એ તલાટીને લાંચ લેતા રંગે હાથે ઝડપી પાડ્યો

ભ્રષ્ટાચાર વિરોધી અભિયાનમાં વધુ એક સફળતા મેળવતા એન્ટી કરપ્શન બ્યુરો (ACB) ના મહીસાગર યુનિટે એક તલાટી-કમ-મંત્રીને 5,000 ની લાંચ સ્વીકારતા રંગેહાથ ઝડપી પાડ્યો છે.

ઝડપાયેલા આરોપી અભિનંદન સંજયકુમાર પરમાર (૩૨) દાહોદ જિલ્લાના ઝાલોદ તાલુકાની ધધેલા-ઈટાવા ગ્રામ પંચાયતમાં વર્ગ-૩ના તલાટી-કમ-મંત્રી તરીકે ફરજ બજાવે છે.

એક જાગૃત નાગરિકની ફરિયાદના આધારે આ છટકું ગોઠવાયું, કારણ કે આરોપી સત્તાવાર કાર્યવાહી અને વિકાસ કાર્યોના બિલો મંજૂર કરવા ગેરકાયદેસર લાંચ માંગતો હોવાનો આરોપ હતો.

એસીબીના જણાવ્યા અનુસાર, RCC રસ્તાઓ અને કોમ્યુનિટી ટોઇલેટના નિર્માણ માટે વહીવટી મંજૂરી અપાઈ હતી. આ કામો પૂર્ણ થયા બાદ ફરિયાદી CC ફોર્મ ભરવા, બાકી બિલો મંજૂર કરાવવા અને અન્ય પ્રક્રિયાઓ પૂર્ણ કરવા આરોપીનો સંપર્ક કર્યો હતો. આ તલાટી-કમ-મંત્રીએ આ કાર્યો માટે 30,000 ની લાંચની માંગણી કરી હતી.

ફરિયાદમાં જણાવાયું છે કે આરોપીએ હપ્તામાં 17,500 અને 2,000 રોકડા તેમજ બે વખત ઓનલાઈન ટ્રાન્સફર દ્વારા 2,500 અને 500 એમ કુલ 22,500 પહેલેથી મેળવ્યા હતા. આરોપીએ વધારાના 5,000 ની માંગણી કરતા, ફરિયાદીએ એસીબીનો સંપર્ક કર્યો હતો.

ફરિયાદના આધારે એસીબીએ છટકું ગોઠવ્યું હતું. ૨૧ ડિસેમ્બર, ૨૦૨૫ ના રોજ હાથ ધરાયેલી કાર્યવાહી દરમિયાન, ઝાલોદ બસ સ્ટેશનના મુખ્ય ગેટ બહાર ચાની લારી નજીક પંચ સાક્ષીઓની હાજરીમાં આરોપીએ ફરિયાદી પાસેથી 5,000 ની લાંચ સ્વીકારી હતી. આ લાંચની રકમ આરોપી પાસેથી ઘટનાસ્થળે કબજે કરાઈ છે.

English summary

The Mahisagar unit of the Gujarat ACB arrested a talati-minister in Dahod over a ₹5,000 bribe linked to road and toilet project approvals. Bribe was paid in cash and online transfers; discovery followed a citizen complaint and a sting operation at Zalod station.