ભાજપે ગુજરાતના વધુ 3 સાંસદોની ટિકિટ કાપી, નવા ચહેરાઓને તક
ભાજપે ગુજરાતના વધુ 3 સાંસદોની ટિકિટ કાપી, નવા ચહેરાઓને તક
ગાંધીનગરઃ લોકસભા ચૂંટણી નજીક હોય બધી જ પાર્ટીઓએ પોતપોતાના ઉમેદવારોની જાહેરાત કરવાનું ચાલુ કરી દીધું છે. પરંતુ ભાજપે આ વખતે પોતાના ઉમેદવારોની યાદીમાં કેટલાય સાંસદોને ઝાટકો આપ્યો છે. કુલ 8 જેટલા સાંસદોને ભાજપે આ વખતે પડતા મૂક્યા છે અને તેમની જગ્યાએ નવા ચહેરાઓને મોકો આપવામાં આવ્યો છે. રવિવારે ગુજરાતની અન્ય 4 લોકસભા સીટ માટે ભાજપે પોતાના ઉમેદવારોની યાદી જાહેર કરી હતી. જેમાંથી 3 સિટિંગ સાંસદોનાં પત્તાં કપાયાં છે.
રવિવારે જાહેર કરાયેલ યાદીમાં ભાજપે પાટણના સાંસદ લીલાધર વાઘેલાને પડતા મૂકી પૂર્વ પાર્લામેન્ટ્રી સેક્ટ્રેટરી ભરતસિંહ ડાભીની ટિકિટ આપી છે. આ સીટ પર તેઓની ટક્કર કોંગ્રેસના જગ્દીશ ઠાકોર સામે થશે. બંને પાર્ટીએ પાટણ સીટ ઠાકોર ઉમેદવારોને ઉતાર્યા છે. જ્યારે છોટાઉદેપુરથી ભાજપે સાંસદ રામસિંહ રાઠવાને પડતા મૂકી ગીતાબેન રાઠવાને ટિકિટ આપી છે અને આણંદ સીટ પરથી દિલિપભાઈ પટેલને પડતા મૂકિ મિતેશ પટેલને ટિકિટ આપવામાં આવી છે. ચર્ચા હતી કે જૂનાગઢથી રાજેશભાઈ ચૂડાસમાને પડતા મૂકવામાં આવી શકે છે પરંતુ ભાજપે રાજેશભાઈ ચૂડાસમાને જૂનાગઢથી રિપિટ કર્યા છે. ઉપરાંત તાલાળા વિધાનસભા સીટની પેટાચૂંટણી માટે ભાજપે જસાભાઈ બારડનું નામ જાહેર કર્યું છે.
આ પણ વાંચો- સત્તામાં આવ્યા પછી આંધ્રપ્રદેશને વિશેષ રાજ્યનો દરજ્જો આપીશુ: રાહુલ ગાંધી
જણાવી દઈએ કે ગુજરાતની 26 સીટમાંથી 23 સીટ માટે ભાજપે પોતાના ઉમેદવારો જાહેર કરી દીધા છે. જેમાંથી 8 સિટિંગ સાંસદોને પડતા મૂકી ભાજપે નવા ચહેરાને તક આપી છે. જ્યારે કોંગ્રેસે હજુ 13 સીટ પર જ પોતાના ઉમેદવારોની યાદી જાહેર કરી છે. જૂનાગઢમાં રાજેશભાઈ ચૂડાસમાની સામે કોંગ્રેસના પુંજાભાઈ વંશ ચૂંટણી લડી રહ્યા છે. જણાવી દઈએ કે પૂંજાભાઈ વંશ કોંગ્રેસના ઉનાથી ધારાસભ્ય છે. બંને પાર્ટીના ઉમેદવારો કોળી સમાજના છે.