સાપુતારામાં BSF ના વાહનનો અકસ્માત, 3 જવાન ઘાયલ
ડાંગ જિલ્લાના સાપુતારા ઘાટ પર સેનાના એક વાહનનો ગંભીર અકસ્માત થયો હતો, જેમાં ત્રણ જવાનો ઈજાગ્રસ્ત થયા હતા. આ ઘટનામાં ઘાયલ થયેલા જવાનોને તાત્કાલિક સારવાર અર્થે નજીકની સરકારી હોસ્પિટલમાં ખસેડવામાં આવ્યા હતા. ઘટનાના પગલે સ્થાનિક વહીવટીતંત્ર અને પોલીસ દ્વારા ઝડપી કાર્યવાહી કરવામાં આવી હતી.
મળતી માહિતી મુજબ, આ અકસ્માત ડાંગના સાપુતારા-શામગહાન ઘાટના એક કપરા વળાંક પર બન્યો હતો. ભારતીય સીમા સુરક્ષા દળ (BSF)ની એક ટ્રક મહારાષ્ટ્રના નાશિકથી રાજસ્થાનના જોધપુર બોર્ડર તરફ જઈ રહી હતી ત્યારે આ અકસ્માતનો ભોગ બની હતી.
ટ્રકમાં કુલ તેર જવાનો સવાર હતા. ઘાટના ઢોળાવ પરથી નીચે ઉતરતી વખતે ચાલકે સ્ટીઅરિંગ પરથી કાબૂ ગુમાવી દેતા ટ્રક રસ્તા પર જ પલટી ખાઈ ગઈ હતી. સદનસીબે, આ ઘટનામાં કોઈ મોટી જાનહાનિ ટળી હતી, પરંતુ ત્રણ જવાનોને નાની-મોટી ઈજાઓ પહોંચી હતી.
અકસ્માતની જાણ થતા જ ડાંગ જિલ્લા પોલીસ દળ અને સ્થાનિક નાગરિકો ત્વરિત મદદ માટે ઘટનાસ્થળે દોડી આવ્યા હતા. તેમણે ટ્રકમાં ફસાયેલા તમામ જવાનોને સુરક્ષિત રીતે બહાર કાઢ્યા હતા. પ્રાથમિક સારવાર બાદ, ઇજાગ્રસ્ત જવાનોને વધુ ઉપચાર માટે આહવા સિવિલ હોસ્પિટલમાં દાખલ કરવામાં આવ્યા હતા.
અકસ્માતગ્રસ્ત વાહનમાં સંરક્ષણ સંબંધિત સંવેદનશીલ સાધનો હોવાથી, સ્થાનિક વહીવટીતંત્ર અને સેના દ્વારા તાત્કાલિક સુરક્ષાના કડક પગલાં લેવામાં આવ્યા હતા. ઘટનાસ્થળે અન્ય જવાનો અને પોલીસનો બંદોબસ્ત ગોઠવી દેવામાં આવ્યો છે, જેથી સંરક્ષણ સામગ્રીની સુરક્ષા સુનિશ્ચિત કરી શકાય. હાલ ઈજાગ્રસ્ત જવાનોની સ્થિતિ સ્થિર હોવાનું જાણવા મળ્યું છે.
Click it and Unblock the Notifications
Sign in with Google
