બારડોલીના કોંગ્રેસી ધારાસભ્ય કુંવરજી હળપતિ ભાજપમાં જોડાયા

અમદાવાદ, 4 ડિસેમ્બર : દક્ષિણ ગુજરાતના માંડવી ખાતે મુખ્યમંત્રી નરેન્દ્રભાઈ મોદીની યોજાયેલી જાહેરસભામાં બારડોલીના વર્તમાન ધારાસભ્ય કુંવરજી હળપતિ કોંગ્રેસને રામ-રામ કરી ભાજપામાં જોડાયા છે. માંડવી ખાતે યોજાયેલી સભામાં કુંવરજી હડપતિએ કોંગ્રેસના નકારાત્મક વલણની આકરી ટીકા કરી હતી અને મુખ્યમંત્રી નરેન્દ્રભાઈ મોદીના નેતૃત્ત્વમાં થઇ રહેલી વિકાસયાત્રામાં સહભાગી થવા કોંગ્રેસ છોડીને ભાજપામાં જોડાવવાની જાહેરાત કરી હતી. આ પ્રસંગે નરેન્દ્ર મોદીએ તેમને ખેસ પહેરાવી ભાજપામાં આવકાર આપ્યો હતો.

ઉલ્લેખનીય છે કે નરેન્દ્ર મોદીએ ગુજરાત વિધાનસભા ચૂંટણી 2012ના પ્રચારનો આરંભ કર્યો છે. આ અંતર્ગત તેઓ 5 ડિસેમ્બરના રોજ ડાકોર ભગવાન રણછોડરાયના દર્શન કરી ઝંઝાવાતી ચૂંટણી પ્રવાસનો પ્રારંભ કરશે.

તેઓ સવારે 9.00 કલાકે ડાકોરના પવિત્ર મંદિરે ભગવાન રણછોડરાયના દર્શન કરી ભવન્સ કોલેજના મેદાન ખાતે જાહેરસભાને સંબોધી પોતાના પ્રવાસનો પ્રારંભ કરશે અને ગુજરાતમાં સાર્વત્રિક કમળ લહેર ઉભી કરવા જનતા જનાર્દનને આહ્વાન કરશે.

મોદી ડાકોર સભાને સંબોધી સવારે 10.30 કલાકે મધુબા પાર્ટી પ્લોટ, અંબિકા સૉ મીલ સામે, કાલોલ જાહેરસભા સંબોધશે. કાલોલથી સાયલા લાલજી મહારાજની જગ્યાએ બપોરે 12.20 કલાકે અને બપોરે 1.45 કલાકે મહાવીર જીન કંપાઉન્ડ વાંકાનેર જાહેરસભાને સંબોધવા પહોંચશે.

નરેન્દ્ર મોદીની 5 ડિસેમ્બરના રોજ પાંચમી સભા બપોરે 3.30 કલાકે નંદ ગામ, વરસાડા ચોકડી, ભચાઉ, છઠ્ઠી સભા સાંજે 5.00 કલાકે ભુજ, જયુબીલી ગ્રાઉન્ડ અને સાતમી અને છેલ્લી સભા રાત્રે 7.00 કલાકે પાનીનો ઘોડો, પેડક રોડ, રાજકોટ ખાતે સંબોધી અમદાવાદ પરત આવશે.

English summary

Congress seating MLA of Bardoli Kuwarji Halpati joined BJP.