ભારે વરસાદને કારણે રાજ્યના 950 MSMEs ઉદ્યોગને નુકસાન, 368 કરોડના રાહત પેકેજની માંગ

relief package: ગુજરાતમાં આ સિઝનમાં ચોમાસુ ખૂબ સારુ રહ્યું અને રાજ્યના અનેક જિલ્લામાં ભારે વરસાદને કારણે ખેડૂતોને ભારે પ્રમાણમાં નુકસાન થયુ છે. સરકારે રાહત પેકેજ જાહેર કર્યું છે. ત્યારે ભારે વરસાદને કારણે રાજ્યમાં ઓછામાં ઓછા 950 સૂક્ષ્મ, લઘુ અને મધ્યમ ઉદ્યોગો (MSME) ને નુકસાન થયું છે.

MSME સેક્ટરમાં થયેલા નુકસાનને કારણે હવે ઉદ્યોગકારો રાહત પેકેજ માંગી રહ્યા છે, જેથી આ માટે ગુજરાત સરકારે કેન્દ્ર સરકાર પાસેથી 368.11 કરોડ રૂપિયાનું રાહત પેકેજ માંગ્યું છે. કેન્દ્ર સરકારે રાજ્યસભામાં સાંસદ પરિમલ નથવાણીના પ્રશ્નના જવાબમાં આ માહિતી આપી હતી.

સાંસદ પરિમલ નથવાણીએ કર્યો પ્રશ્ન

સાંસદ પરિમલ નથવાણીએ પ્રશ્ન કર્યો હતો કે, ઔદ્યોગિક વસાહતોમાં વરસાદને કારણે કેટલા ઔદ્યોગિક એકમો ડૂબી ગયા અને સરકારને નુકસાન માટે રાહત કે વળતર માટે કોઈ વિનંતી મળી છે કે કેમ?

958 ઔદ્યોગિક એકમોને નુકસાન

25 નવેમ્બરના રોજ ચાલી રહેલા સંસદ સત્રના તેમના લેખિત જવાબમાં કેન્દ્રીય MSME રાજ્ય મંત્રી શોભા કરંદલાજેએ જણાવ્યું હતું કે, ગુજરાત સરકાર પાસેથી મળેલી માહિતી મુજબ, આ ચોમાસામાં ભારે વરસાદને કારણે 958 ઔદ્યોગિક એકમોને અસર થઈ હોવાનું જાણવા મળ્યું છે.

રાહત પેકેજની માંગણી

મંત્રીએ તેમના લેખિત જવાબમાં જણાવ્યું હતું કે, "ગુજરાતમાંથી મળેલી રજૂઆતોએ ભારે વરસાદ અને પૂરને કારણે થયેલા ઉત્પાદન નુકસાન માટે 36,811 લાખ રૂપિયાની રાહત અથવા વળતરની માંગણી કરી છે."

વડોદરા જિલ્લામાં વ્યાપક નુકસાન

રાજ્યના વિવિધ ભાગોમાં વ્યાપક વરસાદ થયો છે, જેમાં વડોદરા જિલ્લામાં MSME સૌથી વધુ અસરગ્રસ્ત છે. સપ્ટેમ્બરમાં ગુજરાત સરકારે જિલ્લામાં MSMEs માટે રાહત પેકેજની જાહેરાત કરી હતી, જેને વ્યાપક વરસાદને પગલે ભારે પૂરને કારણે નુકસાન થયું હતું.