દેવભૂમિ દ્વારકા: દારૂની હેરાફેરી કરતા 3 ઇસમોની ધરપકડ

ચૂંટણી નજીક આવતા જ રાજ્યમાં દારૂ અને નાણાંની હેરફેર શરૂ થઇ ગઇ છે. પોલીસે દેવભૂમિ દ્વારકામાંથી ઇંગ્લિશ દારૂની 2000 જેટલી બોટલો સાથે 3 ઇસમોને પકડી પાડ્યા હતા.

ચૂંટણી નજીક આવતા જ નાણાં અને દારૂની રેલમછેલ ચાલુ થઈ જતી હોય છે. ત્યારે આ વાતાવરણમાં પોલીસ સતર્ક બનીને સઘન તપાસ કરી રહી છે. આ દરમિયાન ગુરૂવારે દેવભૂમિ દ્વારકા જિલ્લામાં અંગ્રેજી દારૂની ટ્રક પોલીસે ઝડપી પાડી હતી. પ્રાપ્તિ માહિતી અનુસાર, ખંભાળીયા પોલીસને આશરે દારૂની કુલ 2000થી 2200 જેટલી પેટીઓની હેરફેર થઈ રહી હોવાની બાતમી મળી હતી. આ બાતમીના આધારે ખંભાળિયા પોલીસે દારૂનો સમગ્ર જથ્થો પકડી પડ્યો હતો.

જો કે, ખંભાળિયા ખાતે આટલી મોટી સંખ્યામાં માલ રાખવાની જગ્યા ન હોવાને કારણે આ સમગ્ર દારૂનો માલ સલાયા પોલીસ મથકે લઈ જવામાં આવ્યો હતો. આ જથ્થો ક્યાંથી આવ્યો તથા કોણે મોકલાવ્યો, તેમજ ક્યાં લઈ જવામાં આવી રહ્યો હતો તે અંગેની સઘન તપાસ પોલીસે હાથ ધરી છે. દારૂ ભરેલ ટ્રકની સાથે 3 ઈસમોને પણ ખંભાળિયા પોલીસે પકડી પડ્યા હતા. જેમાંથી એક વ્યક્તિ દેવભૂમિ દ્વારકા જિલ્લાના ભાણવડ તાલુકાનો રહેવાસી છે તો બીજા 2 પરપ્રાંતીય છે.

English summary

Devbhumi Dwarka: Ahead of Gujarat Election 2017, police caught 2000 to 2200 bottles of english liqueur.