જાણો તમારા ઉમેદવારને: ગોંડલથી ભાજપના ગીતાબા જાડેજા
ગુજરાતમાં રાજકીય પક્ષો દ્વારા વિધાનસભાની ચૂંટણીમાં ઉમેદવારોના નામ જાહેર કરવામાં આવ્યા હતા. જેમાં ગોંડલની સીટ પરથી ભાજપના ગીતાબા જાડેજાને ટિકિટ આપવામાં આવી છે. ગીતાબા જાડેજા વિષે થોડુ જાણીએ.
ગુજરાત વિધાનસભાની ચૂંટણીમાં ભાજપનો દાવો છે કે તે એક એક બેઠક પર પોતાની નજર બનાવીને આ ચૂંટણી લડી રહી છે. વળી વિધાનસભાની સીટ પરના ઉમેદવારોની યાદી અને વિવાદો પણ આ ચૂંટણીને વધારે રસપ્રદ બનાવી રહ્યા છે, ત્યારે 18 નવેમ્બરના ભાજપ દ્વારા ઉમેદવારોની બીજી યાદી બહાર પાડવામાં આવી છે. આ યાદીમાં ગોંડલની વિધાનસભા સીટ પરના ઉમેદવાર તરીકે ગીતાબા જાડેજાની પસંદગી કરવામાં આવી છે. તો ગીતાબા જાડેજા વિષે થોડુ જાણીએ. ગીતાબા જાડેજા 2012માં ગોંડલ સીટ પરથી વિજેતા થયેલ જયરાજભાઈ જાડેજાના પત્ની છે. જયરાજ ભાઈને ગુજરાત હાઇકોર્ટે 2004માં રાજકોટમાં થયેલ નીલેશ રાયાની હત્યામાં દોષી જાહેર કર્યા છે અને તેમને જન્મટીપની સજા આપવામાં આવી છે. આથી આ સીટ પરથી તેમની પત્નીને ઊભા રાખવામાં આવ્યા છે.
ગોંડલની સીટ ભાજપનો ગઢ ગણાય છે આ વખતની ચૂંટણીમાં એક પણ જુની સીટથી હાથ ધોવા ન પડે એ તકેદારી રાખીને ભાજપ ટિકિટો આપી રહી છે. ત્યારે ગોંડલમાં પણ તેમણે પૂર્વ ધારાસભ્યની પત્નીને ટિકિટ આપીને પોતાની પકડ વધુ મજબુત કરવાનો પ્રયત્ન કર્યો છે. આમ કરવાથી ભાજપને અહીં બે રીતે લાભ થયો છે, એક તો મહિલા ઉમેદવારની પસંદગી અને એક જ પરિવારના સભ્યને ટિકિટ આપી હોવાથી તેમને જૂના મતદારોનો પણ ફાયદો મળશે. ગીતાબાને એક પુત્ર અને બે પુત્રી છે. તેમનો મુખ્ય વ્યવસાય ખેતી છે. તેમની સંપત્તિ લગભગ 2 કરોડ જેટલી છે.