GSEB Exam 2026: ધોરણ 10-12 બોર્ડની પરીક્ષા માટે ટોલ-ફ્રી હેલ્પલાઇન નંબર શરૂ

GSEB Exam 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ-10 અને ધોરણ-12ની બોર્ડ પરીક્ષાઓને લઈને મહત્વનો નિર્ણય લેવામાં આવ્યો છે. પરીક્ષાના ટેન્શનને દૂર કરવા અને વિદ્યાર્થીઓને મૂંઝવતા પ્રશ્નોના ઉકેલ માટે બોર્ડ દ્વારા સત્તાવાર ટોલ-ફ્રી હેલ્પલાઇન સેવાનો પ્રારંભ કરવામાં આવ્યો છે.

ક્યારથી અને કેટલા સમય સુધી સેવા મળશે?

આગામી 26 ફેબ્રુઆરી 2026થી બોર્ડની મુખ્ય પરીક્ષાઓ શરૂ થઈ રહી છે. તે પૂર્વે જ વિદ્યાર્થીઓની સહાય માટે આ હેલ્પલાઇન 12 ફેબ્રુઆરીથી 18 માર્ચ 2026 સુધી ચાલુ રહેશે. વિદ્યાર્થીઓ અને વાલીઓ સવારે 11:00 થી સાંજે 06:00 વાગ્યા દરમિયાન આ સેવાનો લાભ મેળવી શકશે.

આ નંબર પર કરી શકાશે સંપર્ક

બોર્ડ દ્વારા જાહેર કરવામાં આવેલો સત્તાવાર હેલ્પલાઇન નંબર નીચે મુજબ છે:

• ટોલ-ફ્રી નંબર: 1800 233 5500

હેલ્પલાઇનની મુખ્ય વિશેષતાઓ

• નિષ્ણાતો દ્વારા કાઉન્સેલિંગ: આ હેલ્પલાઇન પર અનુભવી કાઉન્સેલર્સ અને સાયકોલોજિસ્ટ (મનોવૈજ્ઞાનિકો) તૈનાત રહેશે.
• માનસિક તણાવમાંથી મુક્તિ: પરીક્ષાના સમયે અનુભવાતા ડર, ગભરાટ કે માનસિક સ્ટ્રેસને દૂર કરવા માટે વિદ્યાર્થીઓને માર્ગદર્શન આપવામાં આવશે.
• પરીક્ષાલક્ષી માર્ગદર્શન: પરીક્ષા પદ્ધતિ, પેપર લખવાની પદ્ધતિ કે અન્ય કોઈ પણ ટેકનિકલ શંકાઓનું નિરાકરણ લાવવામાં આવશે.
• વાલીઓ માટે પણ ઉપયોગી: માત્ર વિદ્યાર્થીઓ જ નહીં, પણ વાલીઓ પણ પોતાના સંતાનની કારકિર્દી કે પરીક્ષાના ડર અંગે નિષ્ણાતો સાથે વાત કરી શકશે.

શિક્ષણ બોર્ડના સચિવ દ્વારા રાજ્યના તમામ વિદ્યાર્થીઓ અને વાલીઓને અપીલ કરવામાં આવી છે કે, પરીક્ષાના આ સમયગાળા દરમિયાન કોઈ પણ પ્રકારની મૂંઝવણ હોય તો આ હેલ્પલાઇનનો મહત્તમ ઉપયોગ કરે. આ સેવાનો હેતુ વિદ્યાર્થીઓ આત્મવિશ્વાસ સાથે પરીક્ષા આપી શકે તે માટેનો છે.

English summary

GSEB Board Exam 2026 Helpline: Toll-free number 1800 233 5500 active from Feb 12 for SSC & HSC students.