ગુજરાત સરકારના કર્મચારીઓ માટે ખુશખબર, મોંઘવારી ભથ્થામાં 4 ટકાનો વધારો

ગાંધીનગર : ગુજરાત સરકારના કર્મચારીઓ માટે એક સારા સમાચાર આવ્યા છે. રાજ્ય સરકારે કર્માચારીઓને મળતા મોંઘવારી ભથ્થામાં ચાર ટકાનો વધારો જાહેર કર્યો છે.

ગુજરાત સરકારના કર્મચારીઓના અને પેન્શનર્સના મોંઘવારી ભથ્થામાં કેન્દ્ર સરકારના ધોરણે ચાર ટકાનો વધારો 1 જૂલાઈ 2022 થી લાગુ કરવાની અને બીજા ચાર ટકાનો વધારો 1 જાન્યુઆરી 2023થી લાગુ કરવાની રાજ્ય સરકાર દ્વારા જાહેરાત કરાઈ છે.

જો કે આ વધારાનો લાભ જે કર્મચારીઓને સાતમા પગાર પંચનો લાભ અપાયેલો છે તેમને જ મળવાપાત્ર થશે. રાજ્ય સરકારના નિર્ણય અનુસાર, રાજ્ય સરકારના પંચાયત સેવા તથા રાજ્ય સરકારના અન્ય કર્મચારીઓ અને પેન્શનર્સ મળી અંદાજે કુલ ૯.૩૮ લાખ લોકોને મોંઘવારી ભથ્થાનો આ વધારાનો લાભ મળશે.

રાજ્ય સરકારે 1 જૂલાઈ 2022 અને 1 જાન્યુઆરી 2023ની અસરથી આપવાના થતા મોંઘવારી ભથ્થામાં આ આઠ ટકા વધારા સાથે એરિયર્સની રકમ આપવાની થાય છે તે ત્રણ હપ્તામાં આપવામાં આવશે.

રાજ્ય સરકાર અનુસાર, આ તફાવતની રકમનો પ્રથમ હપ્તો જૂન 2023 ના પગાર સાથે, બીજો હપ્તો ઓગસ્ટ 2023 ના પગાર સાથે અને ત્રીજો હપ્તો ઓકટોબર 2023ના પગાર સાથે ચૂકવવામાં આવશે. મોંઘવારી ભથ્થાના આ વધારાના પરિણામે રાજ્ય સરકારને અંદાજે વાર્ષિક રૂપિયા ૪,૫૧૬ કરોડનું નાણાકીય ભારણ વધશે.

English summary

Gujarat government has increased the dearness allowance of employees by 4 percent