ગુજરાતના સરકારી કર્મચારીઓ માટે મોટા સમાચાર, ઓક્ટોબરનો પગાર દિવાળી પહેલા ચૂકવાશે

ગુજરાત રાજ્યના સરકારી કર્મચારીઓ અને પેન્શનરો માટે આ વખતે દિવાળી બમણી ખુશી લઈને આવી છે. ગુજરાત સરકારે ઓક્ટોબર-૨૦૨૫ માસનો પગાર અને પેન્શન નિયત સમય કરતાં વહેલો ચૂકવવાની જાહેરાત કરી છે.

સામાન્ય રીતે સરકારી કર્મચારીઓને તેમના પગાર અને ભથ્થાં તે મહિના પછીના મહિનાના પ્રથમ ત્રણ કામકાજના દિવસો દરમિયાન મળે છે. જો કે, આ વર્ષે ૨૦ ઓક્ટોબર ૨૦૨૫ના રોજ દિવાળીનો તહેવાર હોવાથી સરકારે કર્મચારીઓ અને પેન્શનરો ઉત્સાહપૂર્વક તહેવારની ઉજવણી કરી શકે તે માટે પગલું ભર્યું છે.

સરકારના પરિપત્ર અનુસાર, ઓક્ટોબર-૨૦૨૫ માસના પગાર-ભથ્થાં અને પેન્શનની ચુકવણી તબક્કાવાર રીતે તારીખ ૧૪.૧૦.૨૦૨૫, ૧૫.૧૦.૨૦૨૫ અને ૧૬.૧૦.૨૦૨૫ દરમિયાન કરવામાં આવશે. એટલે કે, કર્મચારીઓના ખાતામાં દિવાળીના તહેવાર પહેલા જ રકમ જમા થઈ જશે.

આ નિર્ણય માત્ર રાજ્ય સરકારના નિયમિત કર્મચારીઓ કે પેન્શનરો પૂરતો સીમિત નથી, પરંતુ તેનો લાભ અનુદાનિત શૈક્ષણિક સંસ્થાઓના શૈક્ષણિક અને બિન-શૈક્ષણિક કર્મચારીઓ, પંચાયત સેવાના કર્મચારીઓ અને કરાર આધારિત નિમણૂક પામેલા કર્મચારીઓને પણ મળશે.

English summary

Gujarat Govt Employees: October 2025 Salary to be Paid Early Before Diwali Festival