Gujarat Rain : દક્ષિણ ગુજરાતમાં વરસાદી તાંડવ, નદીઓમાં પૂરની સ્થિતી
Gujarat Rain : ડાંગ જિલ્લામાં ભારે વરસાદને પગલે જનજીવન ખોરવાઈ ગયું છે. છેલ્લા 24 કલાકમાં નોંધાયેલા ભારે વરસાદને કારણે અનેક વિસ્તારોમાં પાણી ભરાયા છે, જેનાથી સામાન્ય નાગરિકોને ભારે મુશ્કેલીઓનો સામનો કરવો પડી રહ્યો છે.
જિલ્લામાં પડેલા આ ધોધમાર વરસાદમાં આહવા ખાતે 4.61 ઈંચ અને સાપુતારામાં 1.5 ઈંચ વરસાદ નોંધાયો છે. ખાતર, બાજ અને આંબાપાડા જેવા નીચાણવાળા વિસ્તારોમાં જળબંબાકારની સ્થિતિ સર્જાઈ છે.
અંબિકા, ગીરા અને પૂર્ણા જેવી મુખ્ય નદીઓમાં પાણીની સપાટી ભયજનક રીતે વધી છે અને ઘોડાપૂર જેવી સ્થિતિ સર્જાઈ છે. આ નદીઓ કાંઠાના વિસ્તારોમાં આવેલા ઘરોમાં પણ પાણી ઘૂસી જતાં સ્થાનિક લોકોને સ્થળાંતર કરવાની ફરજ પડી છે.
નવરાત્રિની શરૂઆતમાં વરસાદ વિઘ્નરૂપ બનતાં ખેલૈયાઓના રંગમાં ભંગ પડ્યો છે. અનેક ગામડાંઓને જોડતા કોઝવે પર પાણી ફરી વળતા વાહનવ્યવહાર થંભી ગયો છે, જેના કારણે લોકોની અવરજવર પર અસર પડી છે.
વલસાડ જિલ્લામાં ભારે વરસાદને પગલે નદી-નાળા છલકાઈ ગયા છે. ઉપરવાસમાં થયેલા ધોધમાર વરસાદથી મધુબન ડેમમાં પાણીની આવક વધી છે, જેને પગલે ડેમના 10 દરવાજા ખોલવાનો નિર્ણય લેવામાં આવ્યો છે.
આ ભારે વરસાદને કારણે ઓરંગા, પાર, વાંકી અને દમણ ગંગા જેવી નદીઓમાં પાણીની આવક સતત વધી રહી છે. વહીવટી તંત્ર દ્વારા સલામતીના ભાગરૂપે કુલ 16 જેટલા રસ્તાઓ બંધ કરવામાં આવ્યા છે.
Click it and Unblock the Notifications
Sign in with Google
