ગુજરાતમાં 2007માં ચૂંટાયેલા ધારાસભ્યોમાં 1 નિરક્ષર અને 2 પીએચડી

ગાંધીનગર : હ્યુમન ડેવલપમેન્ટ ઇન્ડેક્સ અંતર્ગત શિક્ષણ ક્ષેત્રે ગુજરાત દેશના અન્ય 20 અગ્રણી રાજ્યોની સરખામણીએ 16મા ક્રમે આવે છે. છેલ્લા એક દાયકામાં શિક્ષણ ક્ષેત્રે સુધારાનો દર માત્ર 18.02 ટકા રહ્યો છે જે અન્ય રાજ્યોની સરખામણીએ ઘણો નીચો છે. મહત્વની બાબત એ છે કે શિક્ષણ ક્ષેત્રે ખૂબ નબળું પરફોર્મન્સ ધરાવતા ગુજરાતમાં લોકપ્રતિનિધિઓના શિક્ષણની વાતો કરીએ તો પણ પરિણામ બહુ સારું નથી.

ગુજરાત વિધાનસભા ચૂંટણી 2007માં ચૂંટાયેલા ધારાસભ્યોના શિક્ષણનું વિશ્લેષણ કરીએ તો જાણવા મળે છે કે કુલ 182 ધારાસભ્યોમાં 1 ધારાસભ્ય નિરક્ષર છે. આ નિરક્ષર ધારાસભ્ય ભાજપની ટીકિટ પર ચૂંટણી લડ્યા છે. જ્યારે માત્ર બે ધારાસભ્યો પીએચડી કરેલા છે. બંને ધારાસભ્યો ભાજપના છે.

ગુજરાતના 182 ધારાસભ્યોમાંથી 29 એટલે કે 17 ટકા ધારાસભ્યો એવા છે જે ધોરણ 8 કે તેથી પણ ઓછું ભણેલા છે. 182માંથી 77 એટલે કે માત્ર 43 ટકા ધારાસભ્યો સ્નાતક કે તેથી વધારે શિક્ષણ મેળવેલા છે.

રાજ્યમાં નરોડા બેઠક પરથી ધારાસભ્ય તરીકે ચૂંટાયેલા અને હાલ જેલમાં કારાવાસની સજા ભોગવી રહેલા પૂર્વ ધારાસભ્ય ડૉ. માયાબેન કોડનાની ડૉક્ટર છે. જ્યારે કચ્છની અંજાર બેઠકના ધારાસભ્ય નીમાબેન બી આચાર્યે પણ ડૉક્ટરેટ કર્યું છે. કેટલા ધારાસભ્યોનું શિક્ષણનું પ્રમાણ કેટલું છે તે જાણવું રસપ્રદ રહશે.

અશિક્ષિત - 1
શિક્ષિત - 15
5મું પાસ - 7
8મું પાસ - 6
10મું પાસ - 36
12મું પાસ - 31
સ્નાતક - 48
વ્યાવસાયિક સ્નાતક - 3
અનુસ્નાતક - 24
ડૉક્ટરેટ - 2
અન્ય - 4
માહિતી નથી - 5
કુલ - 182

English summary

Gujarat MLAs elected in 2007 : 1 illiterate and 2 PhD