Gujarat Police: પોલીસ ભરતીને લઈ મોટા સમાચાર, જાણો ક્યારે લેવાશે શારીરિક પરીક્ષા?

Gujarat Police: ગુજરાત પોલીસ ભરતી અંગે તૈયારી કરી રહેલા ઉમેદવારો માટે એક મહત્વના સમાચાર સામે આવ્યા છે. ગુજરાત પોલીસ ભરતી બોર્ડ દ્વારા જાહેરાત કરવામાં આવી છે કે, પોલીસ સબ-ઇન્સ્પેક્ટર (PSI) કેડર અને લોકરક્ષક કેડરની ભરતી માટેની શારીરિક કસોટી (Physical Test) જાન્યુઆરી 2026ના ત્રીજા સપ્તાહમાં લેવામાં આવશે.

પોલીસ ભરતી બોર્ડ દ્વારા આ અંગેની સત્તાવાર પોસ્ટ સોશિયલ મીડિયા પ્લેટફોર્મ પર મૂકવામાં આવી છે. આ જાહેરાતને કારણે, ઉમેદવારો પાસે શારીરિક કસોટીની તૈયારી કરવા માટે હવે એક મહિના કરતાં પણ ઓછો સમય બાકી રહ્યો છે.

ભરતી માટે અરજી કરવાની છેલ્લી તારીખ

ઉલ્લેખનીય છે કે, PSI અને લોકરક્ષક કેડરની ભરતી માટે ઓનલાઈન અરજી કરવાની પ્રક્રિયા 3 ડિસેમ્બર 2025થી શરૂ થઈ ગઈ છે, અને ઉમેદવારો તારીખ 23 ડિસેમ્બર 2025 (રાત્રે 11:59 PM) સુધી અરજી કરી શકશે.

આ ભરતી અંગેની વિગતવાર જાહેરાત અને સૂચનાઓ 03-12-2025ના રોજ સત્તાવાર વેબસાઇટ https://ojas.gujarat.gov.in પર જાહેર કરવામાં આવી છે, અને અરજી પણ આ જ પોર્ટલ પર ઓનલાઈન કરવાની રહેશે.

કુલ જગ્યા અને કેટેગરીની વિગતોગુજરાત પોલીસમાં વિવિધ કેડરની કુલ 13,591 જગ્યાઓ માટે ભરતી થવા જઈ રહી છે, જેની વિગતો નીચે મુજબ છે.

ગુજરાત પોલીસ ભરતી બોર્ડ ધ્વારા જાહેરાત ક્રમાંકઃ GPRB/202526/1 ની પો.સ.ઇ. કેડર અને લોકરક્ષક કેડરની ભરતી અંગેની શારીરીક કસોટી સંભવીત જાન્યુઆરી-૨૦૨૬ના ત્રીજા સપ્તાહથી યોજવામાં આવનાર છે.

— Gujarat Police Recruitment Board Official (@GPRB_GNR) December 11, 2025

કેડર | જગ્યાઓની સંખ્યા
બિન હથિયારી PSI | 659
હથિયારી PSI | 129
જેલર ગૃપ 2 (પુરુષ) | 70
બિન હથિયારી પોલીસ કોન્સ્ટેબલ | 6,942
હથિયારી પોલીસ કોન્સ્ટેબલ | 2,458
હથિયારી પોલીસ કોન્સ્ટેબલ (SRPF) | 3,002
જેલ સિપાઈ (પુરુષ) | 300
જેલ સિપાઈ (મહિલા) | 31
કુલ જગ્યાઓ | 13,591

સમગ્ર રાજ્યના હજારો ઉમેદવારો માટે આ એક મોટી તક છે અને શારીરિક કસોટીની તારીખ જાહેર થતાં જ ઉમેદવારોએ તેમની તૈયારીને આખરી ઓપ આપવાનું શરૂ કરી દીધું છે.

English summary

Gujarat Police Bharti 2025-26: Physical Test Date Announced for PSI and Lokrakshak Cadre, Check Full Vacancy Details