ગુજરાતની 5780 ખાનગી સ્કૂલોની ફી ઓનલાઈન જોઈ શકાશે, FRCએ વેબસાઈટ પર વિગતો જાહેર કરી

ગુજરાતની ખાનગી શાળાઓમાં ફી ઉઘરાવવા બાબતે પારદર્શિતા લાવવા માટે રાજ્ય સરકાર દ્વારા એક મહત્વનો નિર્ણય લેવામાં આવ્યો છે.

ફી રેગ્યુલેટરી કમિટી (FRC) એ રાજ્યની કુલ 5,780 જેટલી પ્રાઈવેટ સ્કૂલોનું ફી માળખું તેમની સત્તાવાર વેબસાઈટ પર મૂકી દીધું છે.

હવે ખાનગી શાળાઓ FRC દ્વારા નક્કી કરવામાં આવેલી ફી વાલીઓથી છુપાવી શકશે નહીં અને દરેક વિગત ઓનલાઈન ઉપલબ્ધ રહેશે. અગાઉ અનેક ફરિયાદો ઉઠી હતી કે શાળાઓ ફિક્સ ફીના ઓર્ડર છુપાવીને એડમિશન કે ટર્મ ફીના નામે વાલીઓ પાસેથી વધુ પૈસા વસૂલતી હતી.

માહિતી મુજબ, અમદાવાદ શહેરની 2,310 અને ગ્રામ્ય વિસ્તારની 394 શાળાઓની ફી પણ પોર્ટલ પર અપલોડ કરી દેવામાં આવી છે. વાલીઓ હવે તેમના બાળકની શાળા, ધોરણ, માધ્યમ અને બોર્ડ મુજબ મંજૂર થયેલી ફીની ચોક્કસ વિગતો આસાનીથી ચેક કરી શકશે.

ઓનલાઈન ફી ચેક કરવા માટે વાલીઓએ FRCની સત્તાવાર વેબસાઈટ frcgujarat.org ની મુલાકાત લેવાની રહેશે. વેબસાઈટ પર સર્ચ બારમાં શાળાનું નામ લખીને અથવા 'Approved Fee' સેક્શનમાં જઈને ફીનું માળખું જોઈ શકાશે.

નવા આદેશ મુજબ શાળાઓએ તમામ ખર્ચ નિર્ધારિત ફીમાં જ આવરી લેવાના રહેશે અને વધારાની રકમ લેવી ગેરકાયદે ગણાશે. જો કોઈ શાળા નક્કી કરેલી ફી કરતા વધુ રકમની માંગણી કરે, તો વાલીઓ સીધા શિક્ષણ વિભાગમાં પુરાવા સાથે ફરિયાદ કરી શકે છે.

English summary

The Fee Regulation Committee (FRC) in Gujarat has published the fees for private schools on frcgujarat.org, increasing transparency for parents and students and curbing undisclosed charges. The data covers fee details across Ahmedabad and rural areas, enabling straightforward online verification of standard, medium, and board-aligned charges.