ગુજરાતમાં આગામી 24 કલાક અતિ ભારે વરસાદની સંભાવના, 12 જિલ્લામાં એલર્ટ
હવામાન વિભાગની આગાહી મુજબ રાજ્યમાં આગામી 24 કલાક ભારે વરસાદની સંભાવના છે.
અમદાવાદઃ હવામાન વિભાગની આગાહી મુજબ રાજ્યમાં આગામી 24 કલાક ભારે વરસાદની સંભાવના છે. રાજ્યના 4 જિલ્લાઓમાં ઓરેન્જ અને 8 જિલ્લાઓમાં યલો એલર્ટ જાહેર કરવામાં આવ્યુ છે. હવામાન વિભાગે ઉત્તર ગુજરાતમાં અતિ ભારે વરસાદ પડવાની સંભાવના વ્યક્ત કરી છે. ગુજરાતના બનાસકાંઠા, પાટણ, સાબરકાંઠા, અરવલ્લી અને મહેસાણામાં અતિ ભારે વરસાદ વરસી શકે છે. સૌરાષ્ટ્રમાં ભારે વરસાદની સાથે ઝડપી પવન ફૂંકાવાની પણ આગાહી છે. વળી, અમદાવાદ, ખેડા, પંચમહાલ, દાહોદ, મહિસાગર, સુરેન્દ્રનગર, મોરબી અને કચ્છમાં ભારે વરસાદ વરસી શકે છે.
તમને જણાવી દઈએ કે મહિસાગરમાં કડાણા અને ભાદર ડેમમાં પાણીની આવક યથાવત જોવા મળી રહી છે. કડાણા ડેમમાં હાલમાં 1 લાખ 35 હજાર ક્યુસેક પાણીની આવક છે જ્યારે ભાદર ડેમમાં 2 હજાર ક્યુસેક પાણીની આવક નોંધવામાં આવી છે. મહિસાગર અને ભાદર નદી બે કાંઠે વહી રહી છે. મહિસાગર નદી પરનો વણાંકબોરી ડેમ ઓવરફ્લો થઈ ગયો છે. જેના કારણે મહિસાગર અને પંચમહાલના 128 ગામોને એલર્ટ કરવામાં આવ્યા છે.
બનાસકાંઠમાં દાંતીવાડા ડેમ પર બ્લ્યુ સિગ્નલ આપવામાં આવ્યુ છે. ડેમનુ જળ સ્તર 80 ટકાને પાર થતા બ્લ્યુ સિગ્નલ આપવામાં આવ્યુ છે. ડેમમાં પાણીની સપાટી 598.70 ફૂટ પહોંચતા તંત્ર એલર્ટ થઈ ગયુ છે. દાંતીવાડા ડેમની ભયજનક સપાટી 604 ફૂટે પહોંચી ગઈ છે. ડેમમાં અત્યારે 21 હજાર ક્યુસેક પાણીની આવક થઈ છ. જ્યારે 5 વર્ષ બાદ દાંતીવાડા ડેમ ભરાયો છે.