Gujarat News: CM ભૂપેન્દ્ર પટેલે મનપા-પાલિકાઓને 2800 કરોડના ચેક અર્પણ કર્યા, જાણો કયા શહેરને શું મળ્યું?

By Desk

Published: Wednesday, December 17, 2025, 22:05 [IST]

Gujarat News: CM ભૂપેન્દ્ર પટેલે આજે અમદાવાદ ખાતે આયોજિત એક વિશેષ કાર્યક્રમમાં રાજ્યની મહાનગરપાલિકાઓ અને નગરપાલિકાઓને વિકાસ કામો માટે કુલ 2800 કરોડ રૂપિયાના ચેક અર્પણ કર્યા હતા. ગુજરાત સરકારે વર્ષ 2025ને 'શહેરી વિકાસ વર્ષ' જાહેર કર્યું છે, જેના ભાગરૂપે આ માતબર રકમની ફાળવણી કરવામાં આવી છે.

કયા શહેરને કેટલી મળી ગ્રાન્ટ?

શહેરી વિકાસના બજેટમાં 40 ટકાનો જંગી વધારો કરીને સરકારે મુખ્ય ચાર મહાનગરોને નીચે મુજબની સહાય આપી છે.

અમદાવાદ મનપા: 780 કરોડ
સુરત મનપા: 657 કરોડ
વડોદરા મનપા: 235 કરોડ
રાજકોટ મનપા: 195 કરોડ

"પૈસા વાપરવાની કેપેસિટી વધારવી પડશે" - મુખ્યમંત્રીનું નિવેદન

CM ભૂપેન્દ્ર પટેલે આ પ્રસંગે પાલિકાના પદાધિકારીઓને ટકોર કરતા જણાવ્યું હતું કે, "હવે નાણાંની કોઈ અછત નથી, બલ્કે પૈસાનો વધારો થવાનો છે. એટલે નગરપાલિકાઓએ આયોજનબદ્ધ રીતે પૈસા વાપરવાની પોતાની ક્ષમતા વધારવી પડશે." તેમણે વધુમાં ઉમેર્યું કે, ભૂતકાળમાં નાના કામો માટે પણ કમિશનરો પાછળ દોડવું પડતું હતું, પરંતુ નરેન્દ્ર મોદીના નેતૃત્વમાં હવે વિકાસના કામો અટકતા નથી.

ગ્રીન એનર્જી અને સ્માર્ટ સિટી પર ભાર

CMએ શહેરોને આધુનિક અને પર્યાવરણને અનુકૂળ બનાવવા માટે સોલર પેનલના ઉપયોગ પર ભાર મૂક્યો હતો. હાલમાં 120 જેટલા સોલર પ્રોજેક્ટ્સ દ્વારા શહેરોમાં પાવર જનરેશન શરૂ થયું છે, જે પાલિકાના વીજ બિલમાં મોટી બચત કરશે. સાબરમતી રિવરફ્રન્ટ પર ચાલતી ક્રુઝનો ઉલ્લેખ કરી તેમણે રાજકીય ઈચ્છાશક્તિથી થતા પરિવર્તનનું ઉદાહરણ આપ્યું હતું.

હર્ષ સંઘવીએ કોંગ્રેસ પર કર્યા પ્રહારો

આ કાર્યક્રમમાં ઉપસ્થિત હર્ષ સંઘવીએ જણાવ્યું હતું કે, કોંગ્રેસના શાસનમાં લોકો પાણીના ટેન્કર માટે કચેરીઓના ધક્કા ખાતા હતા. તેમણે કહ્યું કે, "રસ્તા કે સ્ટ્રીટ લાઈટનો વિચાર અગાઉની સરકારોએ કર્યો જ નહોતો. આજે CMના કાર્યકાળમાં શહેરો સ્વચ્છતા, ગ્રીન કવર અને સુવિધાઓમાં એકબીજા સાથે હરીફાઈ કરી રહ્યા છે."

ન્યૂઝ હાઈલાઈટ્સ