ગુજરાતમાં ઠંડીમાં આંશિક ઘટાડો, શિયાળાની સિઝનમાં બેવડી ઋતુનો માર, જાણો હવામાન વિભાગની આગાહી
Gujarat Weather: ગુજરાતમાં શિયાળાની જામતી જતી ઠંડી વચ્ચે હવામાનમાં મોટો ફેરફાર જોવા મળ્યો છે. રાજ્યમાં વેસ્ટર્ન ડિસ્ટર્બન્સ સક્રિય થવાને કારણે લઘુત્તમ તાપમાનમાં 1થી 2 ડિગ્રીનો વધારો નોંધાયો છે, જેના કારણે લોકોને કડકડતી ઠંડીમાંથી આંશિક રાહત મળી છે. હાલમાં રાજ્યના અનેક શહેરોમાં વહેલી સવારે ગુલાબી ઠંડી અને બપોરે ગરમી એમ બેવડી ઋતુનો અનુભવ થઈ રહ્યો છે.
તાપમાનમાં વધારો અને બેવડી ઋતુનો અનુભવ
હવામાન વિભાગના જણાવ્યા અનુસાર, છેલ્લા 24 કલાકમાં મહત્તમ તાપમાન 32થી 34 ડિગ્રીની આસપાસ રહ્યું હતું. ઉત્તર-પૂર્વના પવનો ફૂંકાઈ રહ્યા હોવા છતાં વેસ્ટર્ન ડિસ્ટર્બન્સને કારણે ઠંડીનું જોર ઘટ્યું છે. જોકે, આ રાહત લાંબો સમય ટકવાની નથી. હવામાન નિષ્ણાતોના મતે 20 ડિસેમ્બર પછી રાજ્યમાં ફરી એકવાર ઠંડીનો પારો ગગડશે અને ઠંડીનું પ્રમાણ વધશે.
રાજ્યના મુખ્ય શહેરોનું તાપમાન (ડિગ્રીમાં)
ગઈકાલે નોંધાયેલા લઘુત્તમ તાપમાનના આંકડા નીચે મુજબ છે.
શહેર | તાપમાન (°C)
અમદાવાદ | 14.2
ડીસા | 13.6
ગાંધીનગર | 13.5
વડોદરા | 11.2
અમરેલી | 11.2
સુરત | 18.1
રાજકોટ | 15.0
ભાવનગર | 14.0
ભુજ | 16.1
નલીયા | 14.8
મહુવા | 12.5
કેશોદ | 14.3
મધ્ય ગુજરાતમાં ઠંડીનો ચમકારો
અમદાવાદ અને ગાંધીનગર સહિત મધ્ય ગુજરાતમાં હજુ પણ વહેલી સવારે ઠંડીનો અનુભવ થઈ રહ્યો છે. આગામી દિવસોમાં આ શહેરોમાં લઘુત્તમ તાપમાન 15થી 16 ડિગ્રીની આસપાસ રહેવાની શક્યતા છે. જોકે, બપોરના સમયે તાપમાન ઊંચું રહેતા ગરમીનો અહેસાસ થશે. હવામાન વિભાગના મતે આગામી 4 દિવસ તાપમાનમાં 2થી 3 ડિગ્રીનો ઉતાર-ચઢાવ જોવા મળી શકે છે.
ઉત્તર ભારતમાં હાડ થીજવતી ઠંડી: IMDની ચેતવણી
એક તરફ ગુજરાતમાં ઠંડીમાં ઘટાડો થયો છે, તો બીજી તરફ ઉત્તર ભારતમાં શીતલહેરનો પ્રકોપ વધ્યો છે.
- રાજસ્થાન અને પંજાબ: તાપમાન 10 ડિગ્રીથી નીચે પહોંચ્યું છે. સીકરમાં લઘુત્તમ તાપમાન 7 ડિગ્રી નોંધાયું છે.
- મધ્યપ્રદેશ: રાજગઢમાં પારો 7 ડિગ્રી સુધી ગગડ્યો છે.
- યુપી અને હરિયાણા: આ રાજ્યોમાં તીવ્ર ઠંડીને લઈ એલર્ટ જાહેર કરવામાં આવ્યું છે.
આગામી સપ્તાહમાં ઉત્તર ભારતની ઠંડીની અસર ફરી ગુજરાત તરફ વળે તેવી પૂરેપૂરી શક્યતા છે.
Click it and Unblock the Notifications
Sign in with Google
