ગુજરાત માટે આગામી 48 કલાક હજુ પણ ભારે, આ જિલ્લાઓમાં માવઠાની આગાહી

By Desk

Updated: Tuesday, February 24, 2026, 9:10 [IST]

ગુજરાતમાં અત્યારે હવામાનના ત્રણ મિજાજ એકસાથે જોવા મળી રહ્યા છે. છેલ્લા ૨૪ કલાકમાં રાજ્યના વાતાવરણમાં મોટો પલટો આવતા અનેક વિસ્તારોમાં ચોમાસા જેવો માહોલ સર્જાયો છે.

અમદાવાદ સહિત વડોદરા, ભરૂચ અને નર્મદા જેવા જિલ્લાઓમાં કમોસમી વરસાદ નોંધાયો છે. ફેબ્રુઆરીમાં અણધાર્યા વરસાદને કારણે રાજ્યના ખેડૂતોમાં પોતાના પાકને લઈ ચિંતાનું મોજું ફરી વળ્યું છે.

હવામાન નિષ્ણાંત અંબાલાલ પટેલના મતે વેસ્ટર્ન ડિસ્ટર્બન્સની અસર હવે ધીમે-ધીમે ઘટશે. જોકે અરબ સાગર અને બંગાળની ખાડીમાં ભેજ વધતા આગામી ૪૮ કલાક વાદળછાયું વાતાવરણ રહેશે.

તાજેતરની આગાહી મુજબ ૨૫ થી ૨૮ ફેબ્રુઆરી દરમિયાન સૌરાષ્ટ્રમાં માવઠું પડી શકે છે. ગીર સોમનાથ, જૂનાગઢ, અમરેલી અને ભાવનગરના ગ્રામ્ય વિસ્તારોમાં હળવા વરસાદની પૂરેપૂરી શક્યતા છે.

મધ્ય ગુજરાતના પંચમહાલ અને ઉત્તર ગુજરાતના સાબરકાંઠામાં પણ હવામાન પલટાઈ શકે છે. ગાંધીનગર, મહેસાણા અને સુરત જેવા શહેરોમાં શનિવાર સુધી વરસાદી ઝાપટાં પડવાનું અનુમાન છે.

અંબાલાલ પટેલે ૨૭ ફેબ્રુઆરીથી વધુ એક નવું વેસ્ટર્ન ડિસ્ટર્બન્સ સક્રિય થવાની ચેતવણી આપી છે. આ સિસ્ટમ સક્રિય થવાથી માર્ચ મહિનાની શરૂઆતમાં પણ વરસાદી માહોલ જળવાઈ રહેશે.

ભારતીય હવામાન વિભાગે બંગાળની ખાડીમાં સર્જાયેલા લો-પ્રેશરને કારણે દક્ષિણ ભારત પર પણ અસરની સંભાવના વ્યક્ત કરી છે. ગુજરાતમાં ૨૮ ફેબ્રુઆરી સુધી વાતાવરણમાં પલટો યથાવત રહેશે.

કમોસમી વરસાદની ભીતિ વચ્ચે ખેડૂતોને પાક સુરક્ષિત સ્થળે ખસેડવાની સલાહ આપવામાં આવી છે. વરસાદી માહોલ પૂરો થયા બાદ માર્ચના પ્રથમ સપ્તાહથી ગરમીનો પારો વધવાની શક્યતા છે.

માર્ચ મહિનાની ૩ થી ૧૦ તારીખ વચ્ચે રાજ્યમાં આકરી ગરમી અને હીટવેવની પણ આગાહી કરવામાં આવી છે. આમ, ફેબ્રુઆરીના વરસાદ બાદ હવે લોકોએ કાળઝાળ ઉનાળા માટે તૈયાર રહેવું પડશે.