ગુજરાત નવી રમત નીતિ બનાવશે : નરેન્દ્ર મોદી

Updated: Monday, December 31, 2012, 17:24 [IST]

ગાંધીનગર, 31 ડિસેમ્બર : આજે ગુજરાતના મુખ્યમંત્રી નરેન્દ્ર મોદીએ ગાંધીનગરના એક કાર્યક્રમમાં જણાવ્યું કે યુવક સેવા, રમત ગમતો અને સાંસ્કૃતિક પ્રવૃતિઓના વિભાગને ભૂતકાળમાં કયારેય આટલું મહત્વ અપાયું નહોતું તેનો નિર્દેશ કરી જણાવ્યું કે હવે આ સરકારે તો નાણાં, ઉદ્યોગ, કૃષિ જેવા મહત્વના વિભાગોની હરોળમાં તેનો મહિમા કર્યો છે કારણ કે રમત ક્ષેત્રે, યુવાશકિત કૌશલ્ય માટે નવી પેઢી અને આગામી પેઢીઓની ખાસ કાળજી આ સરકાર લઇ રહી છે. તેમણે આ સંદર્ભમાં સ્પોર્ટસ પોલીસી રચવાની અને જિલ્લે જિલ્લે સ્પોર્ટસ સ્કુલ શરૂ કરવાની નેમ પણ વ્યકત કરી હતી.

આજે સવારે મુખ્યમંત્રીએ ગાંધીનગરમાં ખેલ મહાકુંભ 2012 માટેની મશાલ જ્યોત રેલીનું પ્રસ્થાન કરાવ્યું હતું. તેમણે આ પ્રસ્થાન કરાવતા સમયે રમતગમતને સ્પર્ધારૂપે નહીં પણ સમસ્ત સમાજ જીવનના સહજ હિસ્સા તરીકે વિકસાવવાનો નિર્ધાર વ્યકત કર્યો હતો.

આગામી ખેલ મહાકુંભ 2012-13ની પૂર્વ તૈયારીરૂપે 18 દિવસ સુધી આ મશાલ જ્યોત યાત્રા ગુજરાતભરમાં 'રમશે ગુજરાત, જીતશે ગુજરાત'નો સંદેશ લઇને પરિભ્રમણ કરશે. આ વર્ષે 21 જેટલી રમતો માટે વિક્રમસર્જક 21 લાખ ખેલાડીઓએ ભાગ લેવાની નોંધણી
કરાવી છે.

આ પ્રસંગે નરેન્દ્ર મોદીએ જણાવ્યું કે રમતમાં સ્પર્ધા કે હારજીતનું નહીં પણ ખેલદિલીના તંદુરસ્ત વાતાવરણનું મહત્વ છે અને ખેલ મહાકુંભથી ખેલદિલીની પ્રતિષ્ઠા વધશે, ખેલાડીઓની રમતગમત કૌશલ્યની શકિતઓનો આત્મવિશ્વાસ વધશે.