Gujarat Winter: રાજ્યમાં ઠંડીમાં થયો આંશિક ઘટાડો, 10.8 ડિગ્રી સાથે નલિયા બન્યું સૌથી ઠંડુ શહેર

ગુજરાતમાં ઉત્તર તરફથી ફૂંકાતા પવનને કારણે ઠંડીનો અનુભવ યથાવત્, લઘુત્તમ તાપમાનમાં 1 થી 2 ડિગ્રીનો નજીવો વધારો, આગામી 3 દિવસમાં તાપમાન 2 થી 3 ડિગ્રી ઊંચકાવાની શક્યતા, ઉત્તર ભારતમાં રેકોર્ડબ્રેક ઠંડીનો પ્રકોપ.

Gujarat Winter: ગુજરાત રાજ્યભરમાં ઉત્તર તરફના પવનો ફૂંકાવાને કારણે ઠંડીનો ચમકારો હજી પણ જોવા મળી રહ્યો છે. જોકે, છેલ્લા 24 કલાકમાં લઘુત્તમ તાપમાનમાં 1 થી 2 ડિગ્રીનો આંશિક વધારો નોંધાયો છે, જેના કારણે ઠંડીના જોરમાં સહેજ ઘટાડો અનુભવાયો છે.

જોકે, કચ્છનું નલિયા 10.8 ડિગ્રી સેલ્સિયસ લઘુત્તમ તાપમાન સાથે આજે પણ રાજ્યનું સૌથી ઠંડુ શહેર રહ્યું છે.

મુખ્ય શહેરોનું તાપમાન (ડિગ્રીમાં)

શહેર | તાપમાન (°C)

નલિયા | 10.8
રાજકોટ | 12.6
અમરેલી | 12.6
અમદાવાદ | 15.1
કંડલા | 12.6
ગાંધીનગર | 13.5
કેશોદ | 13.1
ડીસા | 13.3
પોરબંદર | 13.7
વડોદરા | 14.0
મહુવા | 13.9
ભુજ | 14.5
ભાવનગર | 15.8

હવામાન વિભાગના જણાવ્યા અનુસાર, આગામી 3 દિવસમાં રાજ્યના તાપમાનમાં ધીમે ધીમે 2 થી 3 ડિગ્રીનો વધારો થવાની સંભાવના છે. પવનની દિશા બદલાતા ઠંડીથી આંશિક રાહત મળી શકે છે.

• દૈનિક હવામાન: હાલમાં વહેલી સવારે કડકડતી ઠંડી, બપોરે હળવો તડકો અને સાંજ પડતાં ઠંડીનું પ્રમાણ ફરી વધી રહ્યું છે, જે તાપમાનના ઉતાર-ચઢાવને કારણે સ્વાસ્થ્ય સમસ્યાઓ વધારી શકે છે.
• સૌરાષ્ટ્ર-કચ્છ: છેલ્લા 24 કલાકમાં સૌરાષ્ટ્ર-કચ્છ સહિતના કેટલાક ભાગોમાં રાત્રે પારો ગગડ્યો છે, પરંતુ આગામી 24 કલાકમાં હવામાન શુષ્ક રહેવાની આગાહી છે.

ઉત્તર ભારતમાં રેકોર્ડબ્રેક ઠંડી યથાવત્

ઉત્તરાખંડના પહાડી વિસ્તારોમાં થયેલી હિમવર્ષાને કારણે ઉત્તર ભારતમાં ઠંડીનો પ્રકોપ યથાવત્ છે.

• હિમાચલ-જમ્મુ કાશ્મીર: હિમાચલ પ્રદેશ અને જમ્મુ કાશ્મીરમાં તાબાનું તાપમાન માઇનસ 5.3°C અને કેલાંગનું તાપમાન માઇનસ 3.6°C નોંધાયું છે.
• રાજસ્થાન-મધ્યપ્રદેશ: રાજસ્થાનમાં સૌથી વધુ ઠંડીનો અનુભવ થઈ રહ્યો છે, જ્યાં 12 જિલ્લામાં તાપમાન 10 ડિગ્રીથી નીચે પહોંચ્યું છે. સીકરમાં સૌથી ઓછું 7 ડિગ્રી તાપમાન નોંધાયું છે. મધ્યપ્રદેશના રાજગઢમાં પણ 7 ડિગ્રી તાપમાન નોંધાયું છે.

English summary

Gujarat Winter: Naliya Records 10.8°C, Remains Coldest, Ahmedabad Dips to 15.1°C as Temperatures Edge Up Slightly