સુરતની ગ્લેમરસ ઈન્ફ્લુએન્ઝર હની પટેલ આપમાં જોડાતા વિવાદ
સુરતની જાણીતી સોશિયલ મીડિયા ઇન્ફ્લુએન્સર હની પટેલ આમ આદમી પાર્ટી (AAP) માં જોડાતા રાજકીય વર્તુળોમાં ભારે ચર્ચા જાગી છે. આ ઘટના બાદ તરત જ સોશિયલ મીડિયા પર તેમના ગાંજા અને બિયર સંબંધિત વીડિયો વાયરલ થતાં વિવાદ વધુ ઘેરો બન્યો છે. વાયરલ થયેલા વીડિયોમાં હની પટેલને બિયરનો ગ્લાસ ભરતા અને વેપ (ઈ-સિગારેટ) કરતા જોઈ શકાય છે.
આ વિવાદ બાદ હની પટેલે સ્પષ્ટતા કરતા જણાવ્યું કે, આ મારો ભૂતકાળ છે, આજે હું આવું નથી કરતી. જો કે, ગાંજાના કેસમાં સંડોવાયેલા હોવા છતાં તેમના AAP માં જોડાવાથી ઘણા સવાલો ઊભા થયા છે. વીડિયો વાયરલ થયા બાદ હની પટેલે સામે આવીને પોતાના પતિ અને ભાજપના નેતાઓ પર ગંભીર આક્ષેપો કર્યા છે.
તેમણે દાવો કર્યો કે તેમના વીડિયો તેમના પતિ અને ભાજપના નેતાઓએ જ વાયરલ કર્યા છે. હાઇબ્રિડ ગાંજાના કેસમાં તેમણે ભાજપના નેતા પ્રદીપ ભાખર પર તેમને ફસાવવાનો ગંભીર આરોપ મૂક્યો. હની પટેલે જણાવ્યું કે, જ્યારે હું બેંગકોકથી પાછી આવી ત્યારે મારા બેગમાં ગાંજો મૂકીને રાજકીય ષડયંત્ર કરવામાં આવ્યું હતું.
તેમણે વધુમાં કહ્યું કે, 19 કિલો 728 ગ્રામ ગાંજો મળ્યો હોવા છતાં પોલીસે રિમાન્ડ ન લીધી, જે રાજકીય હસ્તક્ષેપ સૂચવે છે. મારો પતિ પણ સાથે હતો, તેમ છતાં ફક્ત મને જ જેલમાં મોકલવામાં આવી. મારી ચાર્જશીટમાં મારા પતિની પણ સહી છે, છતાં તેમને કેમ છોડી દેવામાં આવ્યા? હની પટેલે ભારપૂર્વક કહ્યું કે, હું દારૂ કે ગાંજાનું સેવન કરતી નથી, અને આ બધું સાબિત કરી શકું છું.
સુરતની આ મોડેલે ભાજપના નેતા પ્રદીપ ભાખર અને અન્ય પર ગંભીર રાજકીય સેટિંગના આરોપ મૂક્યા. તેમણે સિંહની પજવણીના વીડિયોમાં પણ ભાજપના નેતાઓને શાસન સ્તરે બચાવવાનો આરોપ લગાવ્યો હતો. આ નિવેદનોને કારણે રાજકીય માહોલમાં ભારે ચર્ચાઓ તેજ બની છે અને AAP પર પણ પ્રશ્નો ઉભા થયા છે.
વાયરલ વીડિયો અંગે સોશિયલ મીડિયા પર સ્પષ્ટતા કરતા હની પટેલે કહ્યું કે, "મારા ભૂતકાળ સાથે ભાજપનો ભૂતકાળ પણ જોવામાં આવે. હું આમ જનતાને એક અરીસો બતાવવા માંગુ છું. મારા આ વીડિયોથી કોઈ સમાજ કે પદાધિકારીના માન-સન્માનને ઠેસ પહોંચી હોય તો હું દિલથી માફી માંગુ છું."
Click it and Unblock the Notifications
Sign in with Google
