સુરતઃ નરેન્દ્ર મોદીએ પ્રોટોકોલ તોડી બાળકીને આપ્યા આશીર્વાદ

નરેન્દ્ર મોદીની નજર જેવી આ બાળકી પર પડી કે તેમણે તરત પોતાની કાર થોભાવી, પ્રોટોકોલની ચિંતા કર્યા વગર બાળકીને પોતાની પાસે બોલાવી હતી.

By Oneindia

Updated: Monday, April 17, 2017, 14:28 [IST]

વડાપ્રધાન નરેન્દ્ર મોદી સુરત ના સરકીટ હાઉસથી કિરણ હોસ્પિટલના લોકાર્પણ માટે નીકળ્યા હતા. મોદીની એક ઝલક માટે રોડની બંન્ને બાજુએ મોટી સંખ્યામાં લોકો ઊભા હતાં. કતારગામ દરવાજા પાસે એક નાની બાળકી વડાપ્રધાનનો કાફલાને નિહાળી રહી હતી. બાળકી રોડ પર દોડી જઇ વડાપ્રધાનની ગાડી પાસે જવા જતી હતી, ત્યાં સુરક્ષા કર્મચારીઓએ તેને રોકી હતી.

વડાપ્રધાન નરેન્દ્ર મોદીએ ગાડીમાં બેસી આ ઘટનાક્રમ જોતાં, તેમણે તરત જ પોતાની કાર ઊભી રખાવી તે બાળકીને પોતાની કારમાં બોલાવી આશિર્વાદ આપ્યા હતા.

વડાપ્રધાનનો વિશાળ કાફલો સરકીટ હાઉસ ખાતેથી નીકળ્યો ત્યારે કતારગામ દરવાજા ખાતે અનેક રત્નકલાકાર પરિવારો ત્યાં ઊભા હતા. પીએમ મોદી ની એક ઝલક જોવા માટે અનેક પરિવારો રસ્તા પર ઊભેલા જોવા મળ્યાં હતા, જેમાંની એક હતી આ નાનકડી બાળકી નેન્સી. તે નરેન્દ્ર મોદીને મળવા માટે છેક કાર સુધી દોડી ગઇ હતી. નરેન્દ્ર મોદીની નજર જેવી આ બાળકી પર પડી કે તેમણે તરત પોતાની કાર થોભાવી, પ્રોટોકોલની ચિંતા કર્યા વગર બાળકીને પોતાની પાસે બોલાવી હતી. તેમણે બાળકીને વહાલથી પોતાની પાસે બોલાવી કારમાં બેસાડી હતી. થોડીવાર બાદ તેને પરત તેના માતા પિતા પાસે મોકલી આપી હતી.