ગુજરાતમાં હજુ આટલા દિવસ ઠંડી છક્કા છોડાવશે, હવામાન વિભાગની મોટી આગાહી

By Desk

Updated: Thursday, January 8, 2026, 18:45 [IST]

ગુજરાતમાં હાલ ગાઢ ઠંડીનું મોજું ફરી વળ્યું છે અને ઘણા શહેરોમાં તાપમાન 10 ડિગ્રીથી નીચે આવી ગયુ છે. કચ્છનું નલિયા રાજ્યનું સૌથી ઠંડું શહેર છે. હવામાન વિભાગે આગામી દિવસોમાં હાડ થીજાવતી ઠંડી ચાલુ રહેવાની આગાહી કરી છે.

હવામાન વિભાગની લેટેસ્ટ આગાહી અનુસાર, આજથી રાજ્યમાં ઠંડીનો વધુ એક રાઉન્ડ શરૂ થયો છે. નાગરિકોને આગામી ૧૨ જાન્યુઆરી સુધી આ કાતિલ ઠંડીનો સામનો કરવો પડશે. ઉત્તર-પૂર્વ દિશામાંથી ફૂંકાઈ રહેલા ઠંડા પવનોને કારણે સમગ્ર રાજ્ય કોલ્ડવેવ જેવી સ્થિતિની ઝપેટમાં છે.

પવનની ગતિમાં વધારાને કારણે ઠંડીની તીવ્રતા નોંધપાત્ર રીતે વધી છે. હવામાન વિભાગ અનુસાર, હાલ રાજ્યમાં ૧૫ થી ૨૦ કિલોમીટર પ્રતિ કલાકની ઝડપે ઠંડા પવનો ફૂંકાઈ રહ્યા છે. આ પરિબળોને લીધે લઘુત્તમ તાપમાનમાં સતત ઘટાડો જોવા મળી રહ્યો છે.

ખાસ કરીને ઉત્તર ગુજરાત, સૌરાષ્ટ્ર અને કચ્છના વિસ્તારોમાં તાપમાનમાં મોટો ઘટાડો નોંધાયો છે, જ્યાં શીતલહેરની અસર વધુ અનુભવાઈ રહી છે. રાજ્યમાં સૌથી નીચું તાપમાન જૂનાગઢના ગિરનાર પર્વત પર ૮.૫ ડિગ્રી સેલ્સિયસ નોંધાયું છે.

મેદાની વિસ્તારોમાં અમરેલી અને કચ્છનું નલિયા ૯ ડિગ્રી સેલ્સિયસ સાથે શીતલહેરની અસર હેઠળ છે. રાજધાની ગાંધીનગરમાં પણ તાપમાનનો પારો ૧૨ ડિગ્રી સેલ્સિયસ પર પહોંચતા કડકડતી ઠંડીનો અહેસાસ થઈ રહ્યો છે.

હવામાન વિભાગનું અનુમાન છે કે આગામી ૧૨ જાન્યુઆરી સુધી તાપમાનમાં કોઈ મોટો ફેરફાર શક્ય નથી, જેથી કાતિલ ઠંડી યથાવત રહેશે. જો કે, ત્યારબાદ ધીમે-ધીમે તાપમાનમાં ૨ થી ૩ ડિગ્રી સેલ્સિયસનો વધારો થઈ શકે છે, જે આંશિક રાહત આપી શકે છે.

કાશ્મીરના પહાડી વિસ્તારોમાં બરફવર્ષાને કારણે ઠંડીનો ચમકારો વધ્યો છે. હવામાન વિભાગે ઉત્તરાખંડ, હિમાચલ પ્રદેશ અને જમ્મુ-કાશ્મીરમાં વરસાદની અપેક્ષા રાખી છે. ખાસ કરીને ઊંચાઈવાળા વિસ્તારોમાં ભારે વરસાદ પડી શકે છે.

વધુમાં કાશ્મીરના ડોડા, બડગામ અને શોપિયા જેવા પહાડી વિસ્તારોમાં વરસાદની આગાહી કરાઈ છે. અન્ય કેટલાક ઊંચા સ્થાનો પર બરફવર્ષા પણ ચાલુ છે. દક્ષિણ ભારતમાં, તમિલનાડુ માટે પણ વરસાદની ચેતવણી જારી કરવામાં આવી છે.