સુરતની નવી સિવિલ હોસ્પિટલમાં રેસિડેન્ટ ડૉક્ટરો હડતાળ પર, જાણો કેમ?

ગુજરાતમાં તબીબી દુનિયામાં ફરીથી હંગામાનો માહોલ છે. સુરતની નવી સિવિલ હોસ્પિટલ ફરી એકવાર વિવાદના વમળમાં ફસાઈ છે.

હોસ્પિટલના ટ્રોમા સેન્ટર ખાતે ફરજ બજાવતા સર્જરી વિભાગના રેસિડેન્ટ ડૉક્ટરો અચાનક હડતાળ પર ઉતરી ગયા છે, જેના કારણે ઇમરજન્સી સેવાઓ ખોરવાઈ ગઈ છે.

અહેવાલો અનુસાર, વિવાદની શરૂઆત દર્દી અને તબીબો વચ્ચેની બોલાચાલીથી થઈ હતી. હોસ્પિટલમાં સારવાર લેવા આવેલા એક દર્દીએ ડૉક્ટરો સાથે કથિત રીતે ગેરવર્તણૂક કરી હતી. આ બાબતે તબીબોએ હોસ્પિટલના ચીફ મેડિકલ ઓફિસર (CMO) નો સંપર્ક કર્યો હતો.

જો કે, CMO અને ડૉક્ટરો વચ્ચે જ આ મામલે ઉગ્ર બોલાચાલી થઈ હોવાનું જાણવા મળ્યુ છે. ડૉક્ટરોનો આરોપ છે કે CMO દ્વારા તેમને અસંતોષકારક અને અયોગ્ય જવાબ આપવામાં આવ્યો હતો, જેના કારણે સ્થિતિ વધુ વણસી હતી.

આ વિવાદના પગલે ગુસ્સે ભરાયેલા રેસિડેન્ટ ડૉક્ટરોએ હોસ્પિટલના ઇમરજન્સી ટ્રોમા સેન્ટરની બહાર જ વિરોધ શરૂ કરી દીધો હતો. તેમણે 108 એમ્બ્યુલન્સ મારફતે આવતા ઇમરજન્સી દર્દીઓને હોસ્પિટલમાં પ્રવેશતા રોક્યા હતા, જેના કારણે અનેક દર્દીઓ અને તેમના સગા-સંબંધીઓ મુશ્કેલીમાં મુકાયા છે.

English summary

Surat New Civil Hospital Resident Doctors on Strike: Why Emergency Services Halted at Trauma Center