ગોંડલમાં ભર ઉનાળે ધોધમાર વરસાદ

ગાંધીનગર, 18 એપ્રિલઃ બે દિવસ પહેલા ગુજરાત સહિત ભારતભરમાં અને પાકિસ્તાન, ઇરાકમાં આવેલા ભૂંકપ બાદ બુધવારે મોડી સાંજે સૌરાષ્ટ્રના ગોંડલમાં ધોધમાર વરસાદ પડ્યો હતો. અઢી ઇંચની આસપાસ પડેલા કમોસમી વરસાદના પગલે નદીમાં પૂર આવ્યું હતુ અને ચેક ડેમ ઓવર ફ્લો થઇ ગયા હતા.

આ અંગે મળેલી માહિતી અનુસાર, રાજકોટ અને અમરેલી જિલ્લામાં અચાનક જ બપોર બાદ વાતાવરણમાં પલટો આવ્યો હતો અને સાંજે જાણે કે ચોમાસું ના બેસી ગયું હોય તેવું વાતાવરણ સર્જાઇ ગયું હતું. મોડી સાંજે અચાનક જ ધોધમાર વરસાદ પડતાં ગ્રામજનો કુદરતના આ બદલાયેલા રૂખને જોતા રહી ગયા હતા.

એક સમયે લોકોને એવું લાગી રહ્યું હતું કે આ માવઠું રોકાઇ જશે પરંતુ એકથી અઢી ઇંચ પડેલા આ વરસાદના પગલે બિલયાળાની આસપાસ નદીમાં પૂર આવી ગયું હતુ અને ચેકડેમ ઓવર ફ્લો થઇ ગયા હતા.

અત્રે નોંધનીય છે કે, પાણીની તંગીથી ઝઝૂમી રહેલી પ્રજા માટે આ કમોસમી વરસાદથી નદીમાં પાણીના નીર આવતા લોકો ખુશીથી ઝૂમી ઉઠ્યા હતા.

English summary

tomorow eveing unseason rain came in gondal, after this unseason rain chakdam are overflow and flood into river.