સૌરાષ્ટ્રમાં કોંગ્રેસને મોટો ઝટકો, વિસાવદરના ધારાસભ્ય હર્ષદ રિબડીયાએ ધારાસભ્ય પદેથી રાજીનામું આપ્યુ!
જેમ જેમ ગુજરાત વિધાનસભાની ચૂંટણી નજીક આવી રહી છે તેમ તેમ કોંગ્રેસ માટે મુશ્કેલીઓ વધી રહી છે. એક તો પહેલાથી જ નબળી નેતાગીરી માટે ઝઝૂમી રહેલી કોંગ્રેસ માટે હવે એક મુશ્કેલી વધારતા સમાચાર આવ્યા છે.
જૂનાગઢ : જેમ જેમ ગુજરાત વિધાનસભાની ચૂંટણી નજીક આવી રહી છે તેમ તેમ કોંગ્રેસ માટે મુશ્કેલીઓ વધી રહી છે. એક તો પહેલાથી જ નબળી નેતાગીરી માટે ઝઝૂમી રહેલી કોંગ્રેસ માટે હવે એક મુશ્કેલી વધારતા સમાચાર આવ્યા છે. આ સમાચાર સૌરાષ્ટ્રમાંથી આવ્યા છે અને કોંગ્રેસ માટે આ એક ચારસો ચાલીસ વોટના ઝટકા બરાબર છે.
મળતી માહિતી મુજબ, વિસાવદરના ધારાસભ્ય અને સૌરાષ્ટ્રમાં કોંગ્રેસના કદ્દાવર નેતાઓમાંથી એક ગણાતા હર્ષદ રિબડીયા ધારાસભ્ય પદેથી પણ રાજીનામું આપી દીધુ છે. ગુજરાતમાં માંડ માંડ ટકી રહેલી કોંગ્રેસને હવે સૌરાષ્ટ્રમાં વધુ એક મોટા નેતા ગુમાવવાનો વારો આવ્યો છે. રિબડીયા વિધાનસભા સ્પીકરને મળ્યા હતા અને રાજીનામું આપ્યુ હતું. રિબડીયાના રાજીનામાંનો સ્પીકર દ્વારા સ્વીકાર કરવામાં આવ્યો છે.
અહીં તમને એ પણ જણાવી દઈએ કે, હર્ષદ રિબડીયા કોંગ્રેસના મોટા કદના નેતા છે. રિબડીયાના રાજીનામાં બાદ હવે તે કઈ તરફ ડગ માંડશે તેને લઈને પણ ચર્ચા શરૂ થઈ છે. જો કે આ પહેલા પણ સમાચાર આવ્યા હતા કે, કોંગ્રેસના કેટલાક ધારાસભ્યો પાર્ટી છોડીને ભાજપમાં જોડાઈ શકે છે. ત્યારે હવે જોવાનું એ રહે છે કે રિબડીયા ક્યારે ભાજપમાં જોડાય છે. સુત્રોનું માનીએ તો તેમનું ભાજપમાં જવુ લગભગ નક્કી છે.
કોંગ્રેસ માટે માઠા સમાચાર માત્ર રિબડીયાનું રાજીનામું જ નથી, હજુ પણ સમાચાર આવી રહ્યા છે કે, કોગ્રેસના વધુ બે ધારાસભ્યો પાર્ટી છોડીને કોંગ્રેસ ઝટકો આપી શકે છે.