Weather forecast : દક્ષિણ ગુજરાતમાં વરસાદ દિવાળી બગાડી શકે છે, 24 ઓક્ટોબર સુધી માવઠાની આગાહી
Weather forecast : ગુજરાતમાંથી નૈઋત્યનું ચોમાસું વિદાય લઈ ચૂક્યું છે અને રાજ્યભરમાં તહેવારોની રોનક જામી છે, ત્યારે ભારતીય હવામાન વિભાગ (IMD) તરફથી દક્ષિણ ગુજરાતના કેટલાક જિલ્લાઓ માટે મહત્વની આગાહી કરવામાં આવી છે.
IMDના તાજેતરના પૂર્વાનુમાન મુજબ, આગામી થોડા દિવસો એટલે કે 24 ઓક્ટોબર સુધી દક્ષિણ ગુજરાતના અમુક વિસ્તારોમાં હળવોથી મધ્યમ વરસાદ અથવા ગાજવીજ સાથે ઝાપટાં પડવાની શક્યતા છે.
હવામાન વિભાગે જણાવ્યું છે કે, 21 ઓક્ટોબરથી શરૂ કરીને 25 ઓક્ટોબર સુધી દક્ષિણ ગુજરાતના જિલ્લાઓ ડાંગ, તાપી, નવસારી અને વલસાડ તેમજ કેન્દ્રશાસિત પ્રદેશો દમણ, દાદરા અને નગર હવેલીમાં છૂટાછવાયા સ્થળોએ વરસાદી માહોલ જોવા મળી શકે છે. જો કે, ગુજરાતના બાકીના વિસ્તારોમાં હવામાન સૂકું અને ચોખ્ખું રહેવાની સંભાવના છે.
આ સિસ્ટમની અસર પૂરી થતાં 25 ઓક્ટોબરથી હવામાનમાં મોટો પલટો આવશે. IMDના જણાવ્યા અનુસાર, 26 ઓક્ટોબરથી સમગ્ર ગુજરાત રાજ્યમાં વરસાદની ગતિવિધિ લગભગ સમાપ્ત થઈ જશે અને વાતાવરણ સૂકું થઈ જવાની અપેક્ષા છે. આ સાથે જ પોસ્ટ-મોન્સૂન ગતિવિધિઓનો આ રાઉન્ડ સમાપ્ત થશે.
હાલમાં ત્રણ અલગ-અલગ વેધર સિસ્ટમ્સ સક્રિય હોવાને કારણે ગુજરાતમાં આ અસામાન્ય વરસાદ જોવા મળી રહ્યો છે. દક્ષિણપૂર્વ અરબી સમુદ્ર પર એક લો-પ્રેશર એરિયા બની રહ્યો છે, જે ધીમે ધીમે પશ્ચિમ તરફ આગળ વધીને 24 કલાકમાં ડિપ્રેશનમાં ફેરવાઈ શકે છે.
આ ઉપરાંત, બંગાળની ખાડીમાં પણ એક નવું લો-પ્રેશર એરિયા સર્જાયું છે અને કેરળના કિનારે અરબી સમુદ્રમાં એક અપર-એર સાયક્લોનિક સર્ક્યુલેશન પણ યથાવત છે. આ ત્રણેય સિસ્ટમ્સ ભેજ ખેંચી રહી છે, જેના પરિણામે દક્ષિણ ગુજરાતના ભાગોમાં છૂટાછવાયા વરસાદની સંભાવના ઊભી થઈ છે.
Click it and Unblock the Notifications
Sign in with Google
