આરૂષિ કેસ: ૧૪ સાક્ષીઓની જુબાની લેવાની અરજી ફગાવાઈ

Updated: Monday, February 9, 2015, 11:26 [IST]

નવી દિલ્હી, 28 મે : આરૂષિ મર્ડર કેસમાં સુપ્રીમ કોર્ટે તલવાર દંપતીની 14 સાક્ષીઓનાં નિવેદનો નોંધવાની અરજીને નકારી કાઢી છે. તલવાર દંપતીએ અલ્હાબાદ હાઈ કોર્ટનાં 21મેનાં આદેશને સુપ્રીમ કોર્ટમાં પડકાર્યો હતો જેમાં કહેવાયું હતું કે, ફરિયાદીએ જરૂરિયાત વગર કોઈ સાક્ષીઓને બોલાવવાનું દબાણ કરવાની જરૂર નથી.

અલ્હાબાદ હાઈકોર્ટનું એ પણ માનવું હતું કે, નિચલી કોર્ટે એ નિર્ણય કરવાનો અધિકાર છે કે, કયા સાક્ષીઓને બોલાવા અને કયાને નહીં. આ પહેલા 13મેએ સુપ્રીમ કોર્ટે તલવાર દંપતીની અરજીને નકારી કાઢી હતી અને નીચલી કોર્ટનાં ચુકાદાને સીધા જ સુપ્રીમ કોર્ટમાં પડકારતા કોર્ટે વાંધો પણ ઉઠાવ્યો હતો.

સીબીઆઈનું કહેવું છે કે, પાંચ વર્ષ પહેલાની આ ઘટનામાં 14 વર્ષની આરૂષિને તેના જ માતા-પિતાએ મોતને ઘાટ ઉતારી દીધી હતી. આરૂષિની 16મી મે, 2008માં તેનાં જ બેડરૂમમાં કપાયેલા ગળા સાથે મૃત જોવાઈ હતી. શરૂઆતમાં શંકા નોકર હેમરાજ પર ગઈ હતી પરંતુ બાદમાં તેનો પણ મૃતદેહ ઘરનાં ધાબા પરથી મળી આવ્યો હતો.