લેન્ડિંગ ગેર બગડતા 2 કલાક હવામાં અટવાયું વિમાન, જાણો સમગ્ર ઘટના

Air india Express Sharjah Bound Flight: ઘણીવાર ટેકનિકલ ખામીના કારણે ફ્લાઈટને લેન્ડિંગ અને ટેક ઓફ કરતા સમયે સમસ્યાનો સામનો કરવો પડે છે. આવા સમયે ફ્લાઈટમાં રહેલા મુસાફરોનો જીવ તાળવે ચોંટી જતો હોય છે. આવો જ એક કિસ્સો તામિલનાડુના ત્રીચી એરપોર્ટ પર બન્યો છે.

તમિલનાડુના ત્રિચીથી UAEના શારજાહ જઈ રહેલી એર ઈન્ડિયા એક્સપ્રેસ ફ્લાઈટમાં મોટી ટેકનિકલ ખામી સર્જાઈ હતી. આ પછી તિરુચિરાપલ્લી એરપોર્ટ પર ઈમરજન્સી જાહેર કરવામાં આવી હતી.

ઉલ્લેખનીય છે કે, આ ફ્લાઈટમાં 141 મુસાફરો સવાર હતા. આ વિમાન બે કલાક સુધી આકાશમાં ચક્કર લગાવતું રહ્યું હતું. જોકે, વિમાન સુરક્ષિત રીતે ઉતરી જતાં મુસાફરોએ રાહતનો શ્વાસ લીધો હતો.

ઉલ્લેખનીય છે કે, વિમાનના લેન્ડિંગ ગિયરમાં ટેકનિકલ ખામી હોવાનું જણાવવામાં આવ્યું હતું, એરપોર્ટ પર ઈમરજન્સી લેન્ડિંગની તૈયારીઓ કરવામાં આવી હતી.

આ સાથે પ્રશાસને તમામ વ્યવસ્થા કરી હતી, એર ઈન્ડિયા એક્સપ્રેસના અધિકારીએ જણાવ્યું હતું કે, હાલ સાવચેતી માટે તમામ તૈયારીઓ કરવામાં આવી રહી છે. લેન્ડિંગ થઈ ગયું છે, અને એમ્બ્યુલન્સ પણ એરપોર્ટ પર હાજર છે.

એરપોર્ટ મેનેજમેન્ટના જણાવ્યા અનુસાર, એર ઈન્ડિયા એક્સપ્રેસ ફ્લાઈટ AXB613એ 140 મુસાફરો સાથે સાંજે 5:40 કલાકે ત્રિચીથી શારજાહ માટે ઉડાન ભરી હતી.

પ્લેન રનવે પરથી હવામાં પહોંચતા જ તેની હાઈડ્રોલિક સિસ્ટમ ખરાબ થઈ ગઈ હતી. આ પછી પાયલોટે ઈમરજન્સી જાહેર કરી અને એરપોર્ટ મેનેજમેન્ટને જાણ કરી હતી.

એરપોર્ટ મેનેજમેન્ટે જણાવ્યું હતું કે, પ્લેનને લેન્ડિંગમાં સમસ્યા આવી રહી હતી. ઇંધણ ઓછું કરવા માટે વિમાનને હવામાં ઉડાડવામાં આવ્યું હતું. વિમાન લગભગ અઢી કલાક સુધી હવામાં ચક્કર મારતું રહ્યું હતું.

ત્રિચી એરપોર્ટ પાસે લાંબા સમય સુધી ચક્કર લગાવવાને કારણે 140 મુસાફરોના જીવ જોખમમાં મૂકાઈ ગયા હતા. નોંધનીય બાબત છે કે, ઇમરજન્સીને ધ્યાનમાં રાખીને એરપોર્ટ પર એમ્બ્યુલન્સ અને ફાયર બ્રિગેડને બોલાવવામાં આવી હતી.

English summary

Air india Express Sharjah Bound Flight stuck in air for 2 hours due to landing gear