આંધ્ર કોંગ્રેસને આંચકો : સાંસદ કેશવ રાવ ટીઆરએસમાં જોડાયા

હૈદરાબાદ, 30 મે : આંધ્રપ્રદેશમાં કોંગ્રેસ પાર્ટીને એક મોટો આંચકો આપતી એક રાજકીય ઘટનામાં કોંગ્રેસના વરિષ્ઠ નેતા અને સાંસદ કેશન રાવે ગુરુવારે પક્ષમાંથી રાજીનામુ આપી દીધું છે. રાજીનામુ આપ્યા બાદ તેઓ તેલંગાણા રાષ્ટ્ર સમિતિ (ટીઆરએસ)માં જોડાઇ ગયા છે. પ્રાપ્ત માહિતી અનુસાર કેશવ રાવે અલગ તેલંગાણાની રચના મુદ્દે સર્જાયેલા મતભેદને કારણે પાર્ટીમાંથી રાજીનામુ આપ્યું છે.

સ્થાનિક રાજકીય સૂત્રો તરફથી પ્રાપ્ત અહેવાલો અનુસાર કેશવ રાવના પગલાને આંધ્રપ્રદેશ કોંગ્રેસના બીજી બે સાંસદો પણ અનુસરી શકે છે. તેઓ પણ પાર્ટીમાંથી રાજીનામુ આપીને ટીઆરએસમાં જોડાઇ શકે છે.

તેલંગાણા કોંગ્રેસના સાંસદોએ પોતાની માંગણીને પ્રબળ બનાવવાના પ્રયત્નો કર્યા છે અને માગ પર અડીખમ ઉભા રહ્યા છે. આ કારણે રાજ્યમાં સત્તા પર રહેલી પાર્ટીને નુકસાન થઇ રહ્યું હોવાનું માનવામાં આવી રહ્યું છે. ઉલ્લેખનીય છે કે આ વિવાદના ઉકેલ માટે કેન્દ્ર સરકારે વર્ષ 2013માં આંધ્રપ્રદેશની અગ્રણી પાર્ટીઓ સાથે એક બેઠક યોજી હતી. જોકે આ મુદ્દાને ઉકેલવા માટે વધારે ચર્ચા વિચારણાની આવશ્યકતા ઉભી થઇ છે.

English summary

Blow to Andhra Congress: Keshaw Rao joins TRS.