મોટા અધિકારીના નફ્ફટ નબીરાએ ગર્લફ્રેન્ડને ઢોર માર મારીને કાર નીચે કચડવાની કરી કોશિશ, યુવતીએ વર્ણવી ઘટના
Priya Singh News: પ્રિયા સિંહ નામની એક યુવતીને તેના બૉયફ્રેન્ડ અશ્વજિત ગાયકવાડે કથિત રીતે મુંબઈના થાણેમાં એક હોટલ પાસે તેની કાર નીચે કચડી નાખવાનો પ્રયાસ કર્યા પછી તેના આખા શરીરમાં ઈજાઓ થઈ હતી. મહારાષ્ટ્ર સ્ટેટ રોડ ડેવલપમેન્ટ કોર્પોરેશન (MSRDC)ના એમડી અનિલ ગાયકવાડના પુત્ર અશ્વજિત ગાયકવાડ પર તેની ગર્લફ્રેન્ડ પ્રિયા સિંહને તેના મિત્રો સાથે મળીને માર મારવાનો અને કારથી કચડીને તેની હત્યા કરવાનો આરોપ છે.
આ ઘટના 11મી ડિસેમ્બરે બની હતી. પ્રિયા સિંહ સોશિયલ મીડિયા ઈન્ફ્લુએન્સર છે. પ્રિયા સિંહ હાલમાં હૉસ્પિટલમાં દાખલ છે, જ્યાં તેની સારવાર ચાલી રહી છે. તેના શરીરના દરેક ભાગમાં ઈજા થઈ છે. અશ્વજીત ગાયકવાડે પોતાની ગર્લફ્રેન્ડથી છૂટકારો મેળવવા માટે આ બધું કર્યું છે.
પ્રિયા સિંહે તેના ઇન્સ્ટાગ્રામ પર સમગ્ર સત્ય જણાવ્યું છે અને ન્યાયની અપીલ કરી છે. પ્રિયા સિંહે આ ઘટના તેના ઈન્સ્ટાગ્રામ પ્રોફાઈલ પર પોસ્ટ કરી હતી અને કહ્યું હતું કે તે 11 ડિસેમ્બરે સવારે 4 વાગ્યે એક ફેમિલી ફંક્શનમાં તેના બૉયફ્રેન્ડ અશ્વજીતને મળવા ગઈ હતી. પ્રિયાએ કહ્યું કે અશ્વજીત ત્યાં "વિચિત્ર વર્તન" કરી રહ્યો હતો અને તેણે તેની સાથે એકલામાં વાત કરવાનું કહ્યું.
પ્રિયા સિંહે ઇન્સ્ટાગ્રામ પર લખ્યું છે કે તેને હાલમાં જ ખબર પડી કે અશ્વજીત પહેલેથી જ પરિણીત છે. પરંતુ તેમ છતાં તેમનો સંબંધ ચાલુ રહ્યો. પ્રિયાએ દાવો કર્યો હતો કે તેના બૉયફ્રેન્ડ અશ્વજીતે તેના મિત્રો સાથે મળીને તેની સાથે દુર્વ્યવહાર કર્યો હતો, તેનું ગળું દબાવ્યું હતું અને તેની એસયુવી કાર સાથે તેને કચડીને મારી નાખવાનો પ્રયાસ કર્યો હતો. પ્રિયા સિંહ અને અશ્વજીતનું છેલ્લા ચાર વર્ષથી અફેર હતું.
પ્રિયા સિંહની બે ઇન્સ્ટાગ્રામ પ્રોફાઇલ છે, એક @priyasingh_official, જેના 11 લાખ ફોલોઅર્સ છે. બીજાનું સંચાલન @priyasinghprivate દ્વારા કરવામાં આવે છે, જેના 8 હજારથી વધુ ફોલોઅર્સ છે. પ્રિયાએ આ બંને અકાઉન્ટ પર તસવીરો શેર કરીને પોતાની આપવીતી જણાવી છે.
પ્રિયાએ કહ્યું, "11મી ડિસેમ્બરની મોડી રાત્રે હું ઘોડબંદર પોલીસ સ્ટેશન વિસ્તારમાં આવેલી એક હોટલમાં મારા બૉયફ્રેન્ડ અશ્વજીત ગાયકવાડને મળવા ગઈ હતી. અહીં મેં અશ્વજીતને તેની પત્ની સાથે જોયો. જેના પર મને ખૂબ ગુસ્સો આવ્યો. જે બાદ મારી અને અશ્વજીત વચ્ચે ઝઘડો થયો હતો.
જ્યારે હું અશ્વજીત ગાયકવાડ સાથે વાત કરી રહી હતી ત્યારે તેના ત્રણ મિત્રો રોમિલ પાટીલ, પ્રસાદ પાટીલ અને સાગર શેલ્કે મારી સાથે મારપીટ કરવા લાગ્યા હતા. જ્યારે મેં મારો બચાવ કર્યો ત્યારે અશ્વજીત અને તેના ત્રણ મિત્રોએ મને ઢોર માર માર્યો અને તેમની કાર નીચે કચડી નાખવાનો પ્રયાસ કર્યો.
પ્રિયા સિંહે કહ્યું, "મારા બૉયફ્રેન્ડ (અશ્વજિત ગાયકવાડ)એ મને થપ્પડ મારી, મારુ ગળુ દબાવવાનો પ્રયાસ કર્યો, મેં તેને દૂર ધકેલી દેવાનો પ્રયાસ કર્યો તો તેણે મારો હાથ કરડ્યો, માર માર્યો, મારા વાળ ખેંચ્યા અને આ દરમિયાન તેના મિત્રએ અચાનક મને જમીન પર ધક્કો મારી દીધો. "
પ્રિયા સિંહે વધુમાં કહ્યું, "મારી જાતને બચાવવા માટે, હું મારો ફોન અને મારી બેગ લેવા માટે કાર તરફ દોડી અને પછી અશ્વજીતે તેના ડ્રાઈવરને મને કચડી નાખવા કહ્યું. ત્યાર બાદ ડ્રાઈવરે મને ધક્કો માર્યો અને ત્યાંથી ભાગી ગયા. મારો જમણો પગ તૂટી ગયો છે અને મારે સર્જરી કરાવવી પડી હતી, મારા જમણા પગમાં એક સળિયો નાખવામાં આવ્યો હતો. મને મારા આખા શરીર પર ઉઝરડા છે, મારા હાથ પર, મારી પીઠ અને મારા પેટ પર ઉંડા ઉઝરડા છે."
આ ઘટના બાદ પ્રિયાએ થાણેના કાસારવાડવલી પોલીસ સ્ટેશનમાં કેસ નોંધાવવાનો પ્રયાસ કર્યો, પરંતુ ઉચ્ચ અધિકારીઓના દબાણને કારણે ત્યાંના કર્મચારીઓએ કેસ નોંધવાની ના પાડી દીધી. પોલીસે હવે આ મામલાની જાણવાજોગ લઈ તપાસ શરૂ કરી છે.
Click it and Unblock the Notifications
Sign in with Google
