Copycat: રાહુલ ગાંધીએ ચોરી લીધું નરેન્દ્ર મોદીનું સૂત્ર
નવી દિલ્હી, 24 જાન્યુઆરી: શાહરુખ ખાનની ફિલ્મ 'કુછ કુછ હોતા હે' આપને ચોક્કસ યાદ હશે, અને તેનો જાણીતો ડાયલોગ પણ- રાહુલ ઇઝ એ ચીટર ચીટર ચીટર... આજે આ ડાયલોગ ટ્વિટર અને ફેસબુક પર પણ જોરદાર દોડી રહ્યો છે. કારણ કે કોંગ્રેસે નરેન્દ્ર મોદીના સૂત્રને કોપી કરીને રાહુલ ગાંધીનું બનાવી દીધું.
ભારતીય જનતા પાર્ટીના વડાપ્રધાન પદના ઉમેદવાર બનતા જ નરેન્દ્ર મોદીએ મિશન 272 હેઠળ સામાન્ય જનતા પાસે તેમના વિચાર જાણવા માટે એક વેબસાઇટ લોન્ચ કરી, જેનું નામ બીજેપી મેનીફેસ્ટો આપવામાં આવ્યું. તેની જ દેખાદેખી કરીને કોંગ્રેસે પણ કોંગ્રેસ મેનીફેસ્ટોની વેબસાઇટ લોન્ચ કરી દીધી. ચલો આઇડિયા તો દરેકના દિમાગમાં આવે જ છે, તેને ચોરી ના કહી શકીએ. પરંતુ તેને કોપીકેટ કહી શકાય કે નહીં તે આપ જ નક્કી કરી લો.
હા અમે રાહુલની એ જાહેરાતની વાત કરી રહ્યા છીએ, જે આજે દેશભરના સમચારપત્રોમાં છપાયું છે. આ જાહેરાતમાં મોટા મોટા અક્ષરોમાં છપાયું છે કે 'મે નહી હમ'. જાહેરાત જોતા જ ભારતીય જનતા પાર્ટીના કાર્યકર્તાઓએ કોંગ્રેસ ઉપાધ્યક્ષ રાહુલ ગાંધીની એવું કહીને મજાક ઉડાડવાની શરૂ કરી દીધી રાહુલ ગાંધીએ મોદીના વિઝનની ચોરી કરી છે.
અત્રે ઉલ્લેખનીય છે કે ફેબ્રુઆરી 2011ના રોજ ગુજરાતના મહેસાણા ખાતે નરેન્દ્ર મોદીની ચિંતન શિબિર યોજાઇ હતી, ત્યારે તેમના મંચ પર 'મે નહી, હમ' સૂત્રવાળુ પોસ્ટર લાગેલું હતું, અને હવે આ સૂત્રનો ઉપયોગ કોંગ્રેસ દ્વારા કરાતા રાજકીય વિવાદ સર્જાયો છે.