Elon Musk's Tesla: ભારતના આ રાજ્યમાં ટેસ્લાનો પ્લાન્ટ લાગશે, જમીન શોધવાનું શરૂ

ઈલોન મસ્ક આજ કાલ ચર્ચામાં છે. ડોનાલ્ડ ટ્રમ્પને રાષ્ટ્રપતિની ચૂંટણી જીતાડવા માટે ઈલોન મસ્કની મહત્વની ભૂમિકા છે. ઈલોન મસ્ક ટ્રમ્પ સરકારમાં પણ મહત્વની ભૂમિકા ધરાવે છે.

હાલમાં જ ભારતના વડાપ્રધાન નરેન્દ્ર મોદી અને ઈલોન મસ્ક વચ્ચે મુલાકાત થઈ છે. એલોન મસ્કની કંપની ટેસ્લા ભારતમાં પોતાનો વ્યવસાય શરૂ કરવા જઈ રહી છે.

કંપની ટૂંક સમયમાં ભારતમાં પોતાનો ઉત્પાદન પ્લાન્ટ સ્થાપી શકે છે. સોમવારે 17 ફેબ્રુઆરીએ ટેસ્લાએ તેના લિંક્ડઇન પેજ પર ભારતમાં કર્મચારીઓની ભરતી કરવા માટે એક પોસ્ટ શેર કરી હતી.

ત્યારબાદ એવી અટકળો લગાવવામાં આવી રહી છે કે ટેસ્લા ટૂંક સમયમાં ભારતમાં પોતાનો ઉત્પાદન પ્લાન્ટ સ્થાપી શકે છે.

હકીકતમાં જ્યારે પીએમ મોદી તાજેતરમાં અમેરિકાની મુલાકાતે આવ્યા હતા, ત્યારે ટેસ્લાના સીઈઓ એલોન મસ્ક તેમને મળ્યા હતા. તે પછી, એવું માનવામાં આવતું હતું કે ટેસ્લાનું ઇલેક્ટ્રિક વાહન ટૂંક સમયમાં ભારતમાં દોડતું જોવા મળશે.

હવે ભારતમાં કર્મચારીઓની ભરતી માટે ટેસ્લાના લિંક્ડઇન પેજ પરની પોસ્ટ પછી એવું માનવામાં આવે છે કે ટેસ્લા ટૂંક સમયમાં ભારતમાં પોતાનો પ્લાન્ટ સ્થાપશે.

ધ ઇકોનોમિક ટાઇમ્સના અહેવાલ મુજબ ટેસ્લાએ ભારતમાં ઇલેક્ટ્રિક વાહન પ્લાન્ટ સ્થાપવા માટે જમીન શોધવાનું પણ શરૂ કરી દીધું છે. કંપની ઘણા રાજ્યોમાં પ્લાન્ટ માટે જમીન શોધી રહી છે. રિપોર્ટ અનુસાર, કંપની મહારાષ્ટ્રમાં પ્લાન્ટ સ્થાપવામાં વધુ રસ દાખવી રહી છે.

રિપોર્ટ અનુસાર, ટેસ્લાની હાલમાં પુણેમાં એક ઓફિસ છે. આ જ કારણ છે કે કંપની મહારાષ્ટ્રમાં વધુ રસ દાખવી રહી છે. અહેવાલમાં જણાવાયું છે કે મહારાષ્ટ્ર સરકારે પુણેની નજીક આવેલા ચાકણ અને ચીખલી નજીક સાઇટ્સ ઓફર કરી છે.

હકીકતમાં ચાકણ એક મુખ્ય ઓટોમોબાઈલ ઉત્પાદન કેન્દ્ર છે, જ્યાં મર્સિડીઝ-બેન્ઝ, ટાટા મોટર્સ, મહિન્દ્રા એન્ડ મહિન્દ્રા, ફોક્સવેગન અને બજાજ ઓટો જેવી કંપનીઓ આવેલી છે. જોકે, મહારાષ્ટ્રના અધિકારીઓએ સ્પષ્ટતા કરી છે કે ચર્ચા હજુ ચાલુ છે અને કોઈ અંતિમ કરાર થયો નથી.

તમને જણાવી દઈએ કે વિશ્વભરના કાર બજારમાં ટેસ્લાની માંગ ઘટી રહી છે. એવું માનવામાં આવે છે કે આ કારણે, એલોન મસ્કની કંપની ટેસ્લા હવે ભારતમાં પોતાનો ઉત્પાદન પ્લાન્ટ સ્થાપવાની તૈયારી કરી રહી છે.