મુંબઇમાં હાઇ ટાઇડ અને ઉત્તરાખંડમાં ભારે વર્ષાની ચેતવણી
નવી દિલ્હી, 15 જુલાઇ : ભારતીય હવામાન વિભાગે કેટલાક રાજ્યો માટે ચેતવણી જાહેર કરી છે. હવામાન વિભાગના જણાવ્યા અનુસાર ઉત્તરાખંડમાં છેલ્લા 48 કલાકથી ભારે વરસાદ વરસી રહ્યો છે. જેના પગલે ભૂસ્ખલનની ચેતવણી આપવામાં આવી છે. જ્યારે મહારાષ્ટ્રના મુંબઇમાં પણ ભારે વરસાદને પગલે હાઇ ટાઇડની ચેતવણી આપવામાં આવી છે.
હવામાન વિભાગે જિલ્લા વહીવટીતંત્રને વધારે વરસાદવાળા વિસ્તારોમાં અગમચેતી રાખીને કામ કરવા સૂચના આપી છે. બીજી તરફ મંગળવારે મુંબઇમાં 4.95 મીટર ઊંચા હાઇ ટાઇડની ચેતવણી આપી છે. આ ચેતવણીને ધ્યાનમાં રાખીને બોમ્બે મ્યુનિસિપલ કોર્પોરેશન (બીએમસી)એ મુંબઇના ડિઝાસ્ટર મેનેજમેન્ટ ડિપાર્ટમેન્ટને તમામ બીચ અને દરિયાકિનારાના વિસ્તારો પર ચાંપતી નજર રાખવા જણાવ્યું છે.
બીજી તરફ વર્ષ 2013માં ભાર વરસાદને કારણે આવેલી કુદરતી આફતને ધ્યાનમાં રાખીને આ વર્ષે ઉત્તરાખંડ સરકારે ધાર્મિક સ્થળો જેવા કે કેદારનાથ, બદ્રીનાથ અને ગંગોત્રી વિસ્તારોમાં ખાસ વ્યવસ્થા કરવામાં આવી છે. આ વિસ્તારોમાં રવિવાર અને સોમવારે નાના ભૂસ્ખલન નોંધવામાં આવ્યા હતા. જેના કારણે અનેક માર્ગો પર ટ્રાફિક જામ થઇ ગયો હતો.
ઉત્તરાખંડના અધિકારીઓના જણાવ્યા પ્રમાણે છેલ્લા બે દિવસોમાં ઉત્તરાખંડના નેતાલા, લાંબગાંવ, ઉત્તરકાશી અને ચોરંગીખાલમાં ભૂસ્ખલન નોંધાયું હતું. જેના પગલે આ વિસ્તારોની ટીમને ચેતવણી આપવામાં આવી છે.