India France: ભારતીય સેનામાં તૈનાત થશે ફ્રેન્ચ કમાન્ડો, શું છે PM મોદીનો માસ્ટરપ્લાન?

India France Defense Deal: ભારત અને ફ્રાન્સ વચ્ચેના તાજેતરના સંરક્ષણ સોદાએ આ ક્ષેત્રે એક નવો ઇતિહાસ રચ્યો છે. AI સમિટમાં PM નરેન્દ્ર મોદી અને રાષ્ટ્રપતિ ઇમેન્યુઅલ મેક્રોંની મુલાકાતે બંને દેશોનો સૈન્ય સહયોગ 'વ્યૂહાત્મક' માંથી 'અતૂટ' બનાવ્યો છે. ભૂમિ સેનાના અધિકારીઓની અદલાબદલી અને સ્વદેશી રાફેલ નિર્માણ આ મુલાકાતના મુખ્ય ફોકસ રહ્યા. સંરક્ષણ મંત્રી રાજનાથ સિંહ અને તેમના ફ્રેન્ચ સમકક્ષ કેથરીન વાટારિનની હાજરીમાં થયેલા આ કરારો ભારતને વૈશ્વિક સંરક્ષણ હબ બનાવવામાં મદદરૂપ થશે.

એક ઐતિહાસિક પહેલ હેઠળ, ભારત અને ફ્રાન્સે આગામી દસ વર્ષ માટે એકબીજાની ભૂમિ સેનામાં સૈન્ય અધિકારીઓ તૈનાત કરવાનો નિર્ણય કર્યો છે. ભારતીય સેનાના ઇતિહાસમાં આ પ્રથમ વખત છે, જ્યારે વિદેશી અધિકારીઓ ભારતની ધરતી પર ફરજ બજાવશે. નિષ્ણાતો માને છે કે, યુક્રેન યુદ્ધને લીધે ફ્રાન્સ ભારતીય સેના પાસેથી કઠિન સંજોગોમાં યુદ્ધ કૌશલ્ય શીખવામાં વધુ રસ ધરાવે છે, જે તેના માટે ફાયદાકારક સાબિત થશે.

PM મોદી અને મેક્રોંએ બેંગલુરુ નજીક ટાટા અને એરબસના નવા હેલિકોપ્ટર પ્લાન્ટનું ઉદ્ઘાટન કર્યું. અહીં H-125 લાઇટ યુટિલિટી હેલિકોપ્ટર (LUH) બનશે, જે દાયકાઓ જૂના ચિત્તા અને ચેતક હેલિકોપ્ટરનું સ્થાન લેશે. આ અત્યાધુનિક હેલિકોપ્ટર માઉન્ટ એવરેસ્ટ જેવી ઊંચાઈ પર પણ સરળતાથી ઉડી શકશે, જેથી હિમાલયની સરહદો પર દેખરેખ અને લોજિસ્ટિક્સ ક્ષમતા અનેકગણી વધશે.

ફ્રાન્સની સફરાન કંપની હવે ભારતના BEL સાથે મળીને 'હેમર' બોમ્બનું ઉત્પાદન કરશે. ભારતીય વાયુસેનાએ 'ઓપરેશન સિંદૂર'માં આતંકવાદી ઠેકાણાઓ નષ્ટ કરવા માટે આ જ ઘાતક બોમ્બનો ઉપયોગ કર્યો હતો. રાફેલ, મિરાજ અને તેજસ પરથી છોડી શકાતા 70 કિલોમીટર રેન્જના આ બોમ્બ ભારતમાં બનવાથી 'મેક ઇન ઇન્ડિયા'ને મજબૂતી મળશે અને યુદ્ધમાં બાહ્ય સપ્લાય ચેઇન પરની નિર્ભરતા ઘટશે.

રાષ્ટ્રપતિ મેક્રોંના ભારત પ્રવાસની મુખ્ય વિશેષતા 114 રાફેલ ફાઇટર જેટ્સ ભારતમાં જ બનાવવાની મંજૂરી હતી. રૂ. 3.25 લાખ કરોડના આ મેગા પ્રોજેક્ટ હેઠળ, ફ્રાન્સની દસોલ્ટ કંપની ભારતમાં પોતાનો પ્લાન્ટ સ્થાપશે. આ સાથે જ, ભારત 400 સ્કૅલ્પ મિસાઇલો પણ ખરીદશે, જે 300 કિલોમીટર દૂરથી દુશ્મનને ખતમ કરી શકે છે. ભવિષ્યમાં, અહીં બનેલા રાફેલ વિમાનોને અન્ય એશિયન દેશોમાં નિકાસ કરવાની પણ તૈયારી છે.

English summary

The India France defence cooperation marks a new era with expanded military staffing on Indian soil, enhanced indigenous Rafale aircraft production, HEMAR bomb development, and a decade-long plan to boost defence industrial ties, including new helicopter manufacturing and export initiatives.