રાહુલ ગાંધી પાસે માત્ર 55 હજાર કેશ, કાર-ઘર પણ નથી, શેર બજારમાંથી કમાય છે પૈસા, જાણો કેટલી છે કુલ સંપત્તિ

Updated: Thursday, April 4, 2024, 9:53 [IST]

Lok Sabha elections 2024: કોંગ્રેસના પૂર્વ અધ્યક્ષ રાહુલ ગાંધીએ બુધવારે કેરળની વાયનાડ બેઠક પરથી લોકસભા ચૂંટણી 2024 માટે ઉમેદવારી નોંધાવી હતી. નોમિનેશન દરમિયાન રાહુલ ગાંધીએ આપેલા ચૂંટણી એફિડેવિટમાં તેમની કુલ આવકનો ઉલ્લેખ કરવામાં આવ્યો છે.

ચૂંટણી એફિડેવિટ મુજબ રાહુલ ગાંધી પાસે હાલમાં માત્ર 55,000 રૂપિયા રોકડા છે. વળી, કોંગ્રેસ નેતાના બેંક ખાતામાં 26,25,157 રૂપિયા જમા છે. જો આપણે નાણાકીય વર્ષ 2022-23ની વાત કરીએ તો આ એક વર્ષ દરમિયાન રાહુલ ગાંધીની કુલ આવક 1,02,78,680 રૂપિયા હતી.

રાહુલ ગાંધીના એફિડેવિટ મુજબ બેંકમાં તેમના નામે 26.25 લાખ રૂપિયા જમા છે. શેરબજારમાં તેમનું કુલ રોકાણ 4.33 કરોડ રૂપિયા છે. રાહુલ ગાંધીનું મ્યુચ્યુઅલ ફંડમાં પણ 3.81 કરોડ રૂપિયાનું રોકાણ છે. જ્યારે સોવરિન ગોલ્ડ બૉન્ડમાં રોકાણ 15.2 લાખ રૂપિયા છે. આ સિવાય રાહુલ ગાંધી પાસે 4.2 લાખ રૂપિયાની જ્વેલરી છે.

આ સિવાય રાહુલ ગાંધીના નામે NSS, પોસ્ટલ સેવિંગ અને ઈન્સ્યોરન્સ પૉલિસીમાં લગભગ 61.52 લાખ રૂપિયા જમા છે. રાહુલ ગાંધી પાસે 9,24,59,264 રૂપિયાની કુલ જંગમ સંપત્તિ છે. તેમની પાસે કુલ સ્થાવર મિલકત આશરે રૂ. 11,14,02,598 છે. આ રીતે રાહુલ પાસે કુલ 20,38,61,862 રૂપિયાની સંપત્તિ છે.

આ સિવાય રાહુલ ગાંધી પર પણ લગભગ 50 લાખ રૂપિયાની લોન છે. તમને જણાવી દઈએ કે જ્યારે રાહુલ ગાંધીએ 2004માં પોતાની પહેલી ચૂંટણી લડી હતી ત્યારે તેમણે પોતાની કુલ સંપત્તિ 55 લાખ રૂપિયા જાહેર કરી હતી. 2019માં યોજાયેલી લોકસભા ચૂંટણી દરમિયાન રાહુલ ગાંધીએ તેમના સોગંદનામામાં જણાવ્યું હતું કે તેમની કુલ સંપત્તિ 15 કરોડ રૂપિયાની આસપાસ છે, તે સમયે તેમની પાસે 72 લાખ રૂપિયાની લોન પણ હતી. છેલ્લા 5 વર્ષમાં રાહુલ ગાંધીની સંપત્તિમાં લગભગ 5 કરોડ રૂપિયાનો વધારો થયો છે.

રાહુલ ગાંધી પાસે પોતાનું કોઈ ઘર નથી. જોકે, ગુરુગ્રામમાં તેના નામે બે કૉમર્શિયલ બિલ્ડિંગ છે. તેમની કિંમત 9 કરોડથી વધુ છે. રાહુલ પાસે દિલ્હીના મહેરૌલીમાં બે ખેતીની જમીન છે. તેઓ અને તેમની બહેન પ્રિયંકા ગાંધી આ જમીનના સંયુક્ત માલિક છે. આ જમીનો અનુક્રમે 2.346 અને 1.432 એકરની છે. આ જમીન તેમને વારસામાં મળી છે. આ જમીનની વર્તમાન કિંમત 2,10,13,598 રૂપિયા છે.