મહારાષ્ટ્ર સ્થાનિક સ્વરાજ્યની ચૂંટણી મુદ્દે સુપ્રીમ કોર્ટે ઈલેક્શન કમિશનનો ઉધડો લીધો
Maharashtra Local Body Elections : સુપ્રીમ કોર્ટે મહારાષ્ટ્ર રાજ્ય ચૂંટણી પંચ (SEC) ને સ્થાનિક સ્વરાજ્ય સંસ્થાઓની ચૂંટણીઓ સમયસર ન કરાવવા બદલ ઠપકો આપ્યો છે.
જો કે, કોર્ટે એક વખતની છૂટ આપતા આ ચૂંટણીઓ 31 જાન્યુઆરી 2026 સુધીમાં પૂર્ણ કરવા આદેશ આપ્યો છે. આ આદેશ બાદ રાજ્ય ચૂંટણી પંચે ત્રણ તબક્કામાં ચૂંટણી યોજવાની તૈયારી કરી લીધી છે.
રાજ્ય ચૂંટણી પંચે હજુ સુધી ચોક્કસ તારીખો જાહેર કરી નથી, પરંતુ તેમના આયોજન મુજબ ચૂંટણીઓ નીચે મુજબ યોજાશે.
- પહેલો તબક્કો (નવેમ્બર અંત) : જિલ્લા પરિષદો અને પંચાયત સમિતિઓની ચૂંટણી
- બીજો તબક્કો (ડિસેમ્બર/જાન્યુઆરી) : નગરપાલિકાઓ અને નગર પંચાયતોની ચૂંટણી
- ત્રીજો તબક્કો (જાન્યુઆરી અંત) : મહાનગરપાલિકાઓની ચૂંટણી
આ તબક્કાવાર ચૂંટણીઓ પાછળ રાજકીય ગણતરીઓ પણ જોવા મળી રહી છે. ખાસ કરીને સત્તાધારી મહાયુતિ ગઠબંધન માને છે કે આ વ્યૂહરચના તેમના માટે ફાયદાકારક સાબિત થશે.
વિપક્ષી ગઠબંધન જેમાં કોંગ્રેસ, શિવસેના (ઉદ્ધવ ઠાકરે જૂથ) અને NCP (શરદ પવાર જૂથ) સામેલ છે, તે હજુ એટલું સંગઠિત જોવા મળતું નથી.
રાજકીય વિશ્લેષકોનું માનવું છે કે ગ્રામીણ વિસ્તારોમાં મહાયુતિનું વર્ચસ્વ વધુ છે. જો જિલ્લા પરિષદો અને નગરપાલિકાની ચૂંટણીઓમાં મહાયુતિ સારો દેખાવ કરશે તો તેની સકારાત્મક અસર મહાનગરપાલિકાઓની ચૂંટણી પર પણ પડી શકે છે.
ચૂંટણી પંચે આ ચૂંટણીઓની તૈયારીઓ ઝડપી બનાવી છે. જિલ્લા પરિષદોના પ્રમુખો માટે અનામત ડ્રો પહેલેથી જ કાઢવામાં આવ્યો છે અને હવે વોર્ડ માટે અનામતનો ડ્રો કાઢવામાં આવશે.
નગરપાલિકાના વોર્ડની રચના 30 સપ્ટેમ્બર સુધીમાં અને મુંબઈ સહિતની 29 મહાનગરપાલિકાઓ માટે 13 ઓક્ટોબર સુધીમાં ફાઇનલ કરાશે. આ પ્રક્રિયા બાદ વોર્ડનું અનામત અને મતદાર યાદી તૈયાર કરવામાં આવશે, જેના પછી જ ચૂંટણીની તારીખો જાહેર થશે.
Click it and Unblock the Notifications
Sign in with Google
