ઝાંસી જંક્શન બન્યુ 'વીરાંગના લક્ષ્મીબાઇ રેલ્વે સ્ટેશન', યોગી સરકારે બદલ્યુ નામ

ચૂંટણીની મોસમમાં પણ ઉત્તર પ્રદેશમાં નામ બદલવાની પ્રક્રિયા ચાલી રહી છે. બુધવારે યોગી સરકારે એક મોટો નિર્ણય લીધો, જે અંતર્ગત ઝાંસી રેલવે સ્ટેશનનું નામ બદલી દેવામાં આવ્યું છે. હવે આ સ્ટેશન 'વીરાંગના લક્ષ્મીબાઈ રેલ્વે સ્ટેશન' તરીકે ઓળખાશે. બુધવારે સાંજે આ અંગેનું જાહેરનામું પણ બહાર પાડવામાં આવ્યું હતું. આગામી દિવસોમાં આ સ્ટેશનનો કોડ પણ બદલાશે. ત્યારે રાજ્ય સરકારના આ નિર્ણય પર રાજકારણ શરૂ થઈ ગયું છે.

આ મામલે ઝાંસી રેલ્વેના એક અધિકારીએ કહ્યું કે રેલ્વે મંત્રાલયના આદેશ બાદ તરત જ નવી દિલ્હીમાં રેલ્વે સ્ટેશનનું નામ બદલવા માટે જરૂરી કાર્યવાહી કરવામાં આવી રહી છે. સ્ટેશન કોડ પણ તે મુજબ બદલાશે. અન્ય એક અહેવાલ મુજબ લગભગ ત્રણ મહિના પહેલા રાજ્ય સરકારે કેન્દ્રીય ગૃહ મંત્રાલયને પોતાનો પ્રસ્તાવ મોકલ્યો હતો. જેનો કેન્દ્રએ સ્વીકાર કર્યો હતો. આવી સ્થિતિમાં હવે યોગી સરકારે આ અંગે એક નોટિફિકેશન બહાર પાડ્યું છે.

જો કે, યુપીમાં સ્ટેશનનું નામ બદલવાનો આ પહેલો કિસ્સો નથી. અગાઉ મુગલસરાય રેલ્વે સ્ટેશનનું નામ બદલીને પંડિત દીન દયાલ ઉપાધ્યાય જંકશન રાખવામાં આવ્યું હતું. આ પછી યોગી સરકારે ફૈઝાબાદ જિલ્લાનું નામ અયોધ્યા રાખ્યું. તે જ અંતર્ગત ફૈઝાબાદ સ્ટેશનનું નામ બદલીને અયોધ્યા કેન્ટ કરવામાં આવ્યું હતું. હવે આ યાદીમાં ઝાંસી સ્ટેશનનું નામ પણ જોડાઈ ગયું છે.

સરકાર આપી રહી છે આ દલીલ

નામ બદલવા માટે પ્રખ્યાત યોગી સરકારે પણ સ્ટેશન બદલવા પાછળ પોતાનો તર્ક આપ્યો છે. તેમના મતે સ્ટેશનનું નામ બદલવાથી આ વિસ્તારમાં પ્રવાસન ક્ષમતા વધી શકે છે. આ સિવાય તેનો ફાયદો બુંદેલખંડ વિસ્તારમાં પણ જોવા મળશે. જો કે રાજકીય નિષ્ણાતો તેને ચૂંટણીના કારણે લેવાયેલો નિર્ણય ગણાવી રહ્યા છે.

અકબર અલ્હાબાદીનું નામ પણ બદલ્યું

યોગી સરકારે પહેલા જ અલ્હાબાદનું નામ બદલીને પ્રયાગરાજ કરી દીધું હતું. આ પછી સ્ટેશનનું નામ પ્રયાગરાજ જંકશન પણ પડ્યું. તાજેતરમાં, ઉત્તર પ્રદેશ ઉચ્ચ શિક્ષણ સેવા આયોગે તેની સત્તાવાર વેબસાઇટ પર પ્રખ્યાત કવિ અકબર અલ્હાબાદીનું નામ બદલીને 'અકબર પ્રયાગરાજી' કર્યું છે. ત્યાંથી જ રાજનીતિની શરૂઆત થઈ. જોકે, બાદમાં અધિકારીઓએ સ્પષ્ટતા કરી હતી કે તેમની વેબસાઈટ હેક થઈ ગઈ છે.

English summary

Now the Yogi government has changed the name of Jhansi railway station