નેપાળના રસ્તે ભારતમાં ઘૂસવાનો પ્રયાસ કરનારા બે ચીની નાગરીકોની ધરપકડ, બિહારથી પકડાયા

છેલ્લા કેટલાક સમયથી નેપાળના રસ્તે ભારતમાં ઘુષણખોરી વધી રહી છે. હાલમાં જ પાકિસ્તાની મહિલા સીમા હૈદર બાદ હવે બે ચીની નાગરીકો નેપાળના રસ્તે ભારતમાં ઘૂસવાનો પ્રયાસ કરતા પકડાયા છે.

સામે આવેલી માહિતી અનુસાર, નેપાળના રસ્તે બિહારમાં પ્રવેશવાની કોશિશ કરી રહેલા આ બે ચીની નાગરીકોને ઈમિગ્રેશન ઓફિસરે પકડ્યા છે. આ બન્ને નેપાળના બીરગંજ થઈને ભારતમાં પ્રવેશવાનો પ્રયાસ કરી રહ્યા હતા.

અહેવાલો અનુસાર, બંને વિઝા વગર જ ભારતીય સરહદમાં પ્રવેશવાનો પ્રયાસ કરી રહ્યા હતા. અહેવાલો એવા પણ છે કે આ બંને ચીની નાગરિકો બીજી વખત ગેરકાયદેસર રીતે ભારતીય સરહદમાં પ્રવેશવાનો પ્રયાસ કરી રહ્યા હતા.

અહેવાલો અનુસાર, બંને 2 જુલાઈના રોજ પહેલીવાર નેપાળ બોર્ડર પાર કરીને ભારતમાં પ્રવેશતા ઝડપાયા હતા અને બંને ફરી એક વખત આમ કરતા ઝડપાયા છે.

હાલ આ બન્ને કેમ ભારતમાં પ્રવેશવાનો પ્રયાસ કરી રહ્યા હતા તેની પાછળનો હેતુ હજુ સુધી જાણી શકાયો નથી. ઈમિગ્રેશન અધિકારીઓને જાસૂસ હોવાની આશંકા છે. અધિકારીઓએ જણાવ્યું કે, સુરક્ષા કર્મચારીઓએ શનિવારે બિહારના પૂર્વ ચંપારણ જિલ્લાના રક્સૌલથી ભારત-નેપાળ સરહદથી ભારતમાં પ્રવેશવાનો પ્રયાસ કરી રહેલા બે ચીની નાગરિકોની ધરપકડ કરી છે.

પૂર્વ ચંપારણના એસપી કંતેશ કુમાર મિશ્રાએ જણાવ્યું કે, ચીનના પૂર્વ પ્રાંત જિયાંગ્સીના રહેવાસી ઝાઓ જિંગ અને એફયુ કાંગ તરીકે ઓળખાતા ચીની નાગરિકો શનિવારે રાત્રે 8.45 કલાકે રક્સૌલ શહેરમાં ભારતીય કસ્ટમ ઓફિસ નજીકથી પકડવામાં આવ્યા છે. તે કોઈપણ માન્ય દસ્તાવેજો વિના સરહદ પાર કરવાનો પ્રયાસ કરી રહ્યા હતા.

English summary

Two Chinese nationals who tried to enter India via Nepal were caught from Bihar