ગુડગાંવમાં ચાલતી કારમાં 2 યુવતીઓ પર બળાત્કાર

| Published: Thursday, June 27, 2013, 18:13 [IST]

ગુડગાંવ, 27 જૂન : એનસીઆરમાં સરકારના તમામ પ્રયત્નો છતાં બળાત્કારની ઘટનાઓમાં કોઇ ઘટાડો થતો નથી દેખાઇ રહ્યો. દિલ્હીની પાસે આવેલ હાઇટેક સિટી ગુડગાંવમાં બુધવારની રાત્રે ચાલતી કારમાં 2 યુવતીઓને ગેંગરેપની ઘટના સામે આવી છે. પોલીસે મામલો નોંધી લીધો છે અને બળાત્કારીઓને પકડી પાડવા માટે ચક્રો ગતિમાન કર્યા છે.

ગુડગાંવના ડીસીપી(પૂર્વ) મહેશ્વર દયાલે ગુરુવારે પત્રકારોને જણાવ્યું કે બુધવારની રાત્રે ગુડગાંવના એક પબમાં પાર્ટીમાં હાજરી આપવા માટે બંને યુવતીઓ ગઇ હતી. પબથી બહાર આવ્યા બાદ તેમને એક યુવકે કારમાં લિફ્ટ આપી. આ પબ એમજી રોડ પર સ્થિત છે.

દયાલના જણાવ્યા અનુસાર થોડેક દૂર સુધી પહોંચ્યા બાદ આ કારમાં બે યુવકો બેસી ગયા. યુવતીઓનો આરોપ છે કે ત્રણેયે એમજી રોડ પર જ ચાલતી કારમાં તેમની પર બળાત્કાર કર્યો.

પોલીસે યુવતીઓની મેડિકલ તપાસ કરાવી છે, જેમાં બળાત્કારની ખરાઇ કરવામાં આવી છે. ડીસીપી દયાલે જણાવ્યું કે આ મામલામાં એફઆઇઆર નોંધવામાં આવી છે અને ફરાર આરોપીઓને પકડી પાડવા માટે પોલીસે શોધખોળ શરૂ કરી દીધી છે.