બાળકો માટે કોવેક્સિનને હજૂ સુધી મંજૂરી આપવામાં આવી નથી
કોરોના વાયરસ સંકટ વચ્ચે દેશમાં 18 વર્ષથી વધુ ઉંમરના 90 કરોડથી વધુ લોકોને કોવિડ રસીનો પ્રથમ અને બીજો ડોઝ આપવામાં આવ્યો છે.
નવી દિલ્હી : કોરોના વાયરસ સંકટ વચ્ચે દેશમાં 18 વર્ષથી વધુ ઉંમરના 90 કરોડથી વધુ લોકોને કોવિડ રસીનો પ્રથમ અને બીજો ડોઝ આપવામાં આવ્યો છે. કોરોનાની સંભવિત ત્રીજી લહેરને ધ્યાનમાં રાખીને હવે 18 વર્ષથી ઓછી ઉંમરના યુવાનો માટે રસી તૈયાર કરવામાં આવી રહી છે.
હજૂ સુધી રસી મંજૂર કરવામાં આવી નથી, આ દિશામાં કામ કરવામાં આવી રહ્યું છે
આ દરમિયાન ગુરુવારના રોજ ઘણા મીડિયા અહેવાલોમાં કહેવામાં આવ્યું છે કે, કેન્દ્ર સરકારે બાળકો માટે રસીની રસીને મંજૂરી આપી છે. જો કે હવે કોરોના રસી અંગે કેન્દ્રીય આરોગ્ય રાજ્યમંત્રી ભારતી પ્રવીણ પવારે સ્પષ્ટતા કરી હતી કે, હજૂ સુધી રસી મંજૂર કરવામાં આવી નથી, આ દિશામાં કામ કરવામાં આવી રહ્યું છે.
અત્યારે કામ ચાલી રહ્યું છે, DGCIની મંજૂરી હજૂ સુધી મળી નથી
ઉલ્લેખનીય છે કે, ગત અઠવાડિયે ભારત બાયોટેકે 18 વર્ષથી ઓછી ઉંમરના બાળકોમાં ઉપયોગ માટે કોવિડ 19 રસી કોવેક્સીનનો બીજો તબક્કો પૂર્ણ કર્યો હતો. ભારત બાયોટેક અને ICMR દ્વારા સંયુક્ત રીતે વિકસિત કોવેક્સિનને બાળકો પર ઉપયોગ માટે ટૂંક સમયમાં મંજૂરી મળે તેવી અપેક્ષા છે. બાળકોની કોરોના રસી પર વાત કરતા કેન્દ્રીય આરોગ્ય રાજ્ય મંત્રી, ભારતી પ્રવીણ પવારે જણાવ્યું કે, અત્યારે કામ ચાલી રહ્યું છે, મને લાગે છે કે કેટલીક મૂંઝવણ સામે આવી રહી છે. DGCIની મંજૂરી હજૂ સુધી મળી નથી. નિષ્ણાતો નક્કી કરશે કે, તે બાદ કોરોના રસી આવશે. પ્રક્રિયા ચાલુ છે અને અમે તેમાં દખલ કરતા નથી.
ભારત બાયોટેકે શું કહ્યું?
બીજી તરફ કોવિડ રસીની મંજૂરીના દાવાઓ પર ભારત બાયોટેકે જણાવ્યું હતું કે, કંપનીએ COVAXIN (BBV152) માટે લેવાયેલા દૈનિક પરીક્ષણોનો ડેટા CDSCO ને 2 થી 18 વર્ષની વય જૂથમાં ઉપયોગ માટે મોકલ્યો છે. CDSCO અને વિષય નિષ્ણાત સમિતિ (SEC) દ્વારા ડેટાની સંપૂર્ણ સમીક્ષા કરવામાં આવી છે અને હકારાત્મક પ્રતિભાવ દર્શાવ્યો છે. અનુમાન લગાવવામાં આવી રહ્યું છે કે, આગામી થોડા અઠવાડિયામાં બાળકો માટે રસી મંજૂર કરવામાં આવશે.