Lok Sabha Election 2024: કોંગ્રેસના વળતા પાણી, એક સાથે 800 કાર્યકર્તાઓ છોડી પાર્ટી

Published: Tuesday, April 2, 2024, 9:48 [IST]

Lok Sabha Election 2024: લોકસભા ચૂંટણી પહેલા કોંગ્રેસને સતત આંચકા લાગી રહ્યા છે. આસામથી લઇને ગુજરાત સુધી કોંગ્રેસના દિગ્ગજ નેતાઓ ભારતીય જનતા પાર્ટીમાં શામેલ થઇ રહ્યા છે. આ વચ્ચે એક બે નહીં પણ ત્રણ મોટા નેતાઓએ પાર્ટી છોડી છે.

આ ઉપરાંત ગુજરાતના જામનગરમાં એક સાથે 800 કોંગ્રેસ કાર્યકર્તાઓએ પાર્ટી છોડીને ભારતીય જનતા પાર્ટીમાં જોડાયા હતા. જામનગરના લોકપ્રિય સાંસદ પૂનમબેન માડમના સક્ષમ નેતૃત્વમાં અને ભાજપની વિકાસલક્ષી વિચારધારાને કારણે હાલાર વિસ્તારમાં કોંગ્રેસને ફરી એકવાર મોટો ફટકો પડ્યો છે.

જામનગર જિલ્લાના કોંગ્રેસના આગેવાનો ભાજપમાં જોડાયા બાદ દેવભૂમિ દ્વારકા જિલ્લામાં ઈતિહાસનો સૌથી મોટો રાજકીય પરિવર્તન જોવા મળ્યો છે. જિલ્લામાં કોંગ્રેસનો લગભગ સફાયો થઈ ગયો છે. જિલ્લા કોંગ્રેસના મહામંત્રી અને તાલુકા પંચાયતના વિરોધપક્ષના નેતા સહિત કોંગ્રેસના અનેક મહત્વના નેતાઓ કોંગ્રેસમાંથી પક્ષપલટો કરી ભાજપમાં જોડાયા હતા.

ભાજપમાં જોડાયેલા નેતાઓમાં દ્વારકા જિલ્લા કોંગ્રેસના મહામંત્રી અને વિપક્ષ જિલ્લા પંચાયતના સભ્ય ઈભાભાઈ કરમુરનો સમાવેશ થાય છે.

આગેવાન અને તાલુકા પંચાયત સદસ્ય યોગેશભાઈ નંદાણીયા, તાલુકા પંચાયત સદસ્ય લક્ષ્મણભાઈ ચાવડા, દ્વારકા કોંગ્રેસ ઓબીસી સેલના પ્રમુખ કિશનભાઈ ભાટીયા, તાલુકા પંચાયત સદસ્ય માલસીભાઈ દહિયા, દ્વારકા જિલ્લા યુવા કોંગ્રેસ પ્રમુખ સાવન કરમુર, ખંભાળિયા એપીએમસીના ડાયરેક્ટર બાબુભાઈ ગોજીભાઈ સરપંચ સહિત 800 જેટલા કોંગ્રેસ કાર્યકર્તાઓ ઉપસ્થિત રહ્યા હતા.

કોંગ્રેસ મુક્ત વાતાવરણ સર્જાયું છેઃ પૂનમબેન માડમ - ખંભાળિયામાં મળેલી બેઠકમાં જામનગરના સાંસદ પૂનમબેન માડમ, રાજ્યના કેબિનેટ મંત્રી મૂળુભાઈ બેરા અને જિલ્લા ભાજપ પ્રમુખ મયુરભાઈ ગઢવીએ કોંગ્રેસના તમામ આગેવાનોનું સ્વાગત કર્યું હતું.

પૂનમબેન માડમે જણાવ્યું હતું કે, દેશની જેમ જામનગર લોકસભા મતવિસ્તારમાં પણ કોંગ્રેસ મુક્ત વાતાવરણ સર્જાયું છે. ભારતની જનતા પાર્ટીએ પણ દેશને કોંગ્રેસ મુક્ત કરવાનો નિર્ધાર કર્યો છે.

પૂનમબેન માડમે જણાવ્યું હતું કે, કોંગ્રેસના નેતાઓ અને કાર્યકરો આપણા પ્રિય વડાપ્રધાન નરેન્દ્ર મોદીના નેતૃત્વમાં દેશનો વિકાસ કરવા માટે એકઠા થયા છે. કોંગ્રેસ પક્ષને સૌથી મોટો ફટકો દેવભૂમિ દ્વારકા જિલ્લામાં પડ્યો છે.

Published On April 2, 2024