Lok Sabha Election 2024 : સુરતમાં 371 શતાયુ મતદારો લોકસભા ચૂંટણી માટે પોતાનો મત આપશે

લોકશાહીમાં ભાગીદાર થવા વરિષ્ઠ અને શતાયુ નાગરિકો દાયકાઓ સુધી નૈતિક ફરજના ભાગરૂપે પોતાના મતાધિકારનો ઉપયોગ કર્યો છે.

આ નાગરિકોને તેમની શારીરિક અશક્તતાના કારણે મત આપવામાં પડતી અગવડતાને દૂર કરવા ભારતના ચૂંટણી પંચ દ્વારા કેટલીક ખાસ વ્યવસ્થાઓ કરવામાં આવી છે.

જેના કારણે વરિષ્ઠ મતદારો વિશેષ સુવિધાઓ સાથે પોતાનો મત આપી શકશે. ત્યારે સુરત જિલ્લાની વાત કરીએ તો જિલ્લામાં આ લોકશાહીના મહાપર્વમાં 100 વર્ષથી વધુ વય ધરાવતા 371 શતાયુ મતદારો નોંધાયા છે. જેઓ આ ચૂંટણી મહાપર્વમાં જોડાઇને અન્યો માટે પ્રેરણારૂપ બનશે.

ચૂંટણીપંચે 85 વર્ષથી વધુ ઉંમરવાળા વરિષ્ઠ નાગરીકો માટે પોસ્ટલ બેલેટ દ્વારા ઘરેથી મતદાનની સુવિધા આપવાની જોગવાઇ કરી છે. ત્યારે સુરતમાં 85 વર્ષથી વધુના 24,676 મતદારો નોંધાયા છે. જે આ જોગવાઇનો લાભ લઇ શકશે.

જયારે 371 શતાયુ મતદારો નોંધાયા છે. જેઓ પણ મતદાન મથક સુધી ન પહોંચી શકે તો ઘરેથી મતદાન કરવાનો લાભ મેળવી શકશે.

મતદાર યાદી મુજબ ઓલપાડ વિધાનસભા મતવિસ્તારમાં 85 વર્ષથી વધુ વય ધરાવતા 1663 તથા 100 વર્ષથી વધુ વય ધરાવતા 23 શતાયુ મતદારો, આ મુજબ 85 વર્ષથી વધુ વય ધરાવતા અને 100 વર્ષથી વધુ વય ધરાવતા મતદારો અનુક્રમે માંગરોળ વિધાનસભામાં 1710 અને 34, માંડવી વિધાનસભામાં 1988 તથા 37, કામરેજ વિધાનસભામાં 1698 અને 26, સુરત પૂર્વ વિધાનસભામાં 2631 અને 26 મતદારો નોંધાયા છે.

આ સિવાય સુરત ઉત્તર વિધાનસભામાં 1244 અને 07, વરાછા રોડ વિધાનસભામાં 038 અને 08, કરંજ વિધાનસભામાં 288 અને 07, લિંબાયત વિધાનસભામાં 849 અને 12, ઉધના વિધાનસભામાં 719 અને 05, મજુરા વિધાનસભામાં 2443 અને 39, કતારગામ વિધાનસભામાં 827 અને 08, સુરત પશ્વિમ વિધાનસભામાં 2506 અને 40, ચોર્યાસી વિધાનસભામાં 1574 અને 28, બારડોલી વિધાનસભામાં 1733 અને 17, મહુવા વિધાનસભામાં 2365 અને 54 વરિષ્ઠ મતદારો નોંધાયેલા છે.

ચૂંટણીઓને સહભાગિતાયુક્ત અને સર્વસમાવેશી બનાવવાની સાથે મતદારોને ચૂંટણી સેવાના ભાગરૂપે ચૂંટણી પંચ દ્વારા પીવાનું પાણી અને શૌચાલય જેવી પ્રાથમિક સુવિધાઓ ઉપલબ્ધ કરાવવામાં આવે છે. જેમાં વરિષ્ઠ નાગરીકો માટે મતદાન સુગમ બની રહે તે માટે વાહન, વ્હીલચેર અને સહાયકની પણ વ્યવસ્થા કરવામાં આવે છે.

English summary

In Surat, 371 voters above 100 years will cast their votes for the Lok Sabha elections