સુરતના હીરા વેપારીએ ખાનગી પ્લેન ખરીદ્યુ, જાણો કિંમત

હીરા અને ટેક્સટાઇલ ઉદ્યોગના કેન્દ્ર સુરતમાં ઉદ્યોગપતિઓની વૈભવી જીવનશૈલી ફરી ચર્ચામાં આવી છે. શહેરના વધુ એક અગ્રણી ઉદ્યોગપતિએ મોંઘું ખાનગી વિમાન (Private Plane) ખરીદ્યું છે.

ધર્મનંદન ડાયમંડ્સ (Dharmanandan Diamonds) કંપનીના મેનેજિંગ ડિરેક્ટર અને માલિક લાલજીભાઈ પટેલના પુત્ર હિતેશ પટેલે (Hitesh Patel) આશરે 11 કરોડની કિંમતનું ફોર-સીટર એરક્રાફ્ટ ખરીદ્યું છે.

અહેવાલો અનુસાર, હીરા ઉદ્યોગ સાથે સંકળાયેલા હિતેશ પટેલે આ ત્રણ વર્ષ જૂનું DA-42 ફોર-સીટર પ્લેન તાજેતરમાં જ સંપન્ન થયેલા નવરાત્રિના તહેવાર દરમિયાન ખરીદ્યું છે. આ પ્લેન સુરત ઇન્ટરનેશનલ એરપોર્ટ પર લેન્ડ થયું હતું.

નોંધનીય છે કે સુરતના હીરા ઉદ્યોગપતિઓ દ્વારા ખાનગી વિમાનોની ખરીદીનો આ પહેલો કિસ્સો નથી. અગાઉ પણ ધંધાકીય અને અંગત પ્રવાસોને ઝડપી બનાવવા માટે અહીંના અનેક દિગ્ગજ ઉદ્યોગપતિઓ ખાનગી જેટ કે એરક્રાફ્ટની માલિકી ધરાવે છે.

વૈશ્વિક વેપાર સાથે સંકળાયેલા સુરતના ઉદ્યોગપતિઓ માટે ઝડપી મુસાફરી અનિવાર્ય બની રહી છે ત્યારે આ નવું પ્લેન તેમના બિઝનેસ પ્રવાસોમાં વધુ સરળતા લાવશે.
આ ખરીદી ફરી એકવાર સુરતના ડાયમંડ સેક્ટરની સમૃદ્ધિ અને અહીંના ઉદ્યોગપતિઓના ઉંચા ગજાના રોકાણની સાબિતી આપે છે.

English summary

Surat Diamond Merchant Hitesh Patel Buys Private Four-Seater Aircraft, Know The Price