રશિયન સેનામાં જોડાયેલા મોરબીના યુવકનું યુક્રેની સેના સામે આત્મસમર્પણ, ડ્રગ્સ કેસમાં હતો રશિયન જેલમાં

મોરબીના એક યુવાને રશિયા-યુક્રેન યુદ્ધના મોરચે યુક્રેનિયન દળો સમક્ષ આત્મસમર્પણ કરીને ગુજરાતમાં ચકચાર જગાવી છે.

અભ્યાસ માટે રશિયા ગયેલા આ યુવાને ડ્રગ્સ કેસમાં સાત વર્ષની જેલની સજામાંથી બચવા રશિયન કાયદાનો લાભ લઈને સેનામાં જોડાયો હતો.

માજોતી સાહિલ મોહંમદ હુસેન નામનો આ યુવાન માત્ર ૨૨ વર્ષનો છે અને મોરબીનો રહેવાસી છે, તે ઉચ્ચ અભ્યાસ માટે રશિયા ગયો હતો.

ત્યાં તેને ડ્રગ્સ સંબંધિત કેસમાં દોષિત ઠેરવવામાં આવ્યો અને સ્થાનિક કોર્ટે સાત વર્ષની જેલની સજા ફટકારી હતી. જેલની સજાથી બચવા માટે સાહિલે રશિયન સેનામાં જોડાવાનો વિકલ્પ પસંદ કર્યો હતો.

રશિયન સેનામાં જોડાયા બાદ માત્ર ૧૬ દિવસની તાલીમ પછી તેને ૧ ઓક્ટોબરના રોજ યુક્રેન સામેના યુદ્ધના મેદાનમાં મોકલવામાં આવ્યો હતો. જો કે, યુદ્ધમાં માત્ર ત્રણ દિવસમાં જ સાહિલે યુક્રેનિયન સૈનિકો સમક્ષ શસ્ત્રો હેઠા મૂકીને આત્મસમર્પણ કરી દીધું હતું.

યુક્રેનિયન દળોએ આ ઘટનાનો વીડિયો પણ જાહેર કર્યો છે, જેમાં સાહિલે કબૂલ્યું કે તે જેલમાં રહેવા માંગતો નહોતો અને તેથી સેનામાં જોડાયો હતો, પરંતુ તે કોઈ પણ સંજોગોમાં ત્યાંથી બહાર નીકળવા માંગતો હતો.

આ ઘટનાએ ફરી એકવાર યુક્રેન યુદ્ધમાં રશિયન સેના તરફથી લડી રહેલા ભારતીય નાગરિકોની સુરક્ષા અને મુક્તિ અંગે ગંભીર ચિંતા ઊભી કરી છે.

આંકડાઓ અનુસાર, સાહિલની જેમ જ ભારતના ૧૨૬ થી વધુ નાગરિકોને રશિયન સેનામાં ભરતી કરવામાં આવ્યા હતા, જેમાંથી કેટલાક એજન્ટોના ફ્રોડનો ભોગ બન્યા હતા.

English summary

Morbi Youth Surrenders to Ukrainian Army: Joined Russian Military to Avoid Drug Case Jail Term